15കാരിക്ക് ചുട്ടുപഴുപ്പിച്ച ഇരുമ്പ് കമ്പികൊണ്ട് മർദ്ദനം, സിഗററ്റ് വച്ച് പൊളളിച്ചു; മൃതദേഹം ശുചിമുറിയിൽ തളളി

ചെന്നൈ: 15കാരിയായ വീട്ടുജോലിക്കാരിയെ ക്രൂരമായി മർദ്ദിച്ച് കൊലപ്പെടുത്തിയ കേസിൽ ദമ്പതികൾ അറസ്​റ്റിൽ. മുഹമ്മദ് നിഷാദും ഭാര്യ നാസിയയുമാണ് പിടിയിലായത്. അമിഞ്ചിക്കരൈ പ്രദേശത്തെ മേത്ത നഗറിലുളള ദമ്പതികളുടെ ഫ്ളാ​റ്റിലെ ജോലിക്കാരിയായിരുന്നു പെൺകുട്ടി. ഇവിടെ വച്ച് പ്രതികൾ പെൺകുട്ടിയുടെ ശരീരത്തിൽ ചൂടാക്കിയ ഇരുമ്പ് കമ്പി ഉപയോഗിച്ച് മർദ്ദിച്ചിരുന്നതായും സിഗറ​റ്റ് ഉപയോഗിച്ച് ശരീരമാകെ പൊളളൽ വരുത്തിയതായും പൊലീസ് കണ്ടെത്തിയിട്ടുണ്ട്. സംഭവത്തിൽ മ​റ്റ് നാല് പേർക്ക് കൂടി ബന്ധമുണ്ടെന്നാണ് പൊലീസ് നൽകുന്ന വിവരം.

കൃത്യം നടത്തിയ ശേഷം പ്രതികൾ പെൺകുട്ടിയുടെ മൃതദേഹം ഫ്ലാ​റ്റിലെ ശുചിമുറിയിൽ ഉപേക്ഷിച്ച് സഹോദരിയുടെ വീട്ടിലേക്ക് രക്ഷപ്പെടുകയായിരുന്നു. മരണ വിവരം നിഷാദിന്റെ വക്കീലാണ് പൊലീസിനെ അറിയിച്ചതെന്നാണ് വിവരം. തഞ്ചാവൂർ ജില്ലക്കാരിയാണ് മരണപ്പെട്ട പെൺകുട്ടി. മൃതദേഹം കിൽപ്പോക്ക് മെഡിക്കൽ കോളേജ് ആശുപത്രിയിലേക്ക് മാ​റ്റിയിട്ടുണ്ട്. പോസ്​റ്റ്‌മോർട്ടം റിപ്പോർട്ട് ലഭിച്ചതിനുശേഷമേ കൂടുതൽ വിവരങ്ങൾ വ്യക്തമാകുകയുളളൂവെന്ന് പൊലീസ് അറിയിച്ചു.