ഒൻപതു വയസുകാരിക്ക് നേരെ ലൈംഗികാതിക്രമം,​ 40 കാരൻ പിടിയിൽ

ഹരിപ്പാട് : ഒൻപതു വയസുകാരിക്ക് നേരെ ലൈംഗികാതിക്രമം കാണിച്ച യുവാവിനെ കരീലകുളങ്ങര പൊലീസ് അറസ്റ്റ് ചെയ്തു. ഹരിപ്പാട് ചിങ്ങോലി ആയിക്കാട്ട് മുറിയിൽ അരുണോദയം വീട്ടിൽ പ്രജിത്ത് (40)​ ആണ് പിടിയിലായത്. ചൈൽഡ് ലൈനിന്റെ പരാതിയിലാണ് പൊലീസിന്റെ നടപടി. കരീലക്കുളങ്ങര സ്റ്റേഷൻ ഹൗസ് ഓഫീസർ നിസാമുദ്ദിന്റെ നേതൃത്വത്തിലാണ് പ്രജിത്തിനെ പിടികൂടിയത് കോടതിയിൽ ഹാജരാക്കിയ ഇയാളെ റിമാൻഡ് ചെയ്തു.

അതേസമയം കേൾവി പരിമിതിയുള്ള വിദ്യാർത്ഥിക്ക് നേകെ ലൈംഗികാതിക്രമം നടത്തിയ കേസിലെ പ്രതി തൃശൂർ ഈസ്റ്റ്ഫോർട്ട് ഡോൺ ബോസ്കോ ലൈനിസെ അമ്പഴക്കാടൻ വീട്ടിൽ തുബൾക്കിനെ (34)​ പൊലീസ് അറസ്റ്റ് ചെയ്തു. കഴിഞ്ഞ അഞ്ചിനാണ് കേസിനാസ്പദമായ സംഭവം. സ്കൂൾ വിട്ടുവന്ന വിദ്യാർത്ഥിയെ ലൈംഗികാതിക്രമ ഉദ്ദേശ്യത്തോടെ ഓട്ടോറിക്ഷാ ഡ്രൈവറായ പ്രതി ആക്രമിക്കുകയായിരുന്നു. സിസി ടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് ഈസ്റ്റ് പൊലീസ് പ്രതിയെ അറസ്റ്റ് ചെയ്തത്.

കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.