ജില്ലയിലേക്ക് ടിക്കറ്റില്ല; വേണം സ്പെഷൽ ട്രെയിൽ

മലപ്പുറം: ബംഗളൂരു, ചെന്നൈ, മുംബൈ, ഡൽഹി എന്നിവിടങ്ങളിൽ നിന്ന് മലബാറിലേക്ക് സ്‌പെഷ്യൽ ട്രെയിനുകൾ അനുവദിച്ചില്ലെങ്കിൽ വിഷുവിന് നാട്ടിലെത്താൻ പാടുപെടും. കഴി‍ഞ്ഞ വിഷുവിന് ചെന്നൈ,​ മുംബൈ എന്നിവിടങ്ങളിൽ നിന്ന് അവസാന നിമിഷമാണ് രണ്ട് സ്പെഷൽ ട്രെയിനുകൾ അനുവദിച്ചത്. ഇതിന് മുമ്പ് തന്നെ ഉയർന്ന നിരക്ക് നൽകി ബസ്,​ വിമാന ടിക്കറ്റുകൾ പലരും ബുക്ക് ചെയ്തതിനാൽ വേണ്ടത്ര പ്രയോജനപ്പെട്ടില്ല. ഇത്തവണ ചെന്നൈ,​ ബംഗളൂരു റൂട്ടിൽ രണ്ട് വീതം സ്പെഷൽ ട്രെയിനുകളും മറ്റിടങ്ങളിൽ നിന്ന് ഒരു ട്രെയിനും മുൻകൂട്ടി അനുവദിച്ചാൽ യാത്രാപ്രശ്നത്തിന് പരിഹാരമാവുമെന്ന് മലയാളി അസോസിയേഷനുകൾ ചൂണ്ടിക്കാട്ടുന്നു.

ബംഗളൂരുവിൽ ടിക്കറ്റില്ല

ബംഗളൂരുവിൽ നിന്ന് നാട്ടിലെത്താൻ പ്രധാനമായും ആശ്രയിക്കുന്ന യശ്വന്ത്പൂർ -കണ്ണൂർ എക്സ്പ്രസിൽ (16257) ഈ മാസം 22നാണ് ഇനി തിരൂരിലേക്ക് ടിക്കറ്റുള്ളത്. രാത്രി എട്ടിന് പുറപ്പെട്ട് പുലർച്ചെ 5.55ന് തിരൂരിലെത്തും. വിഷുവിന് തലേദിവസം ഞായർ ആയതിനാൽ ശനിയാഴ്ച തന്നെ നാട്ടിലേക്ക് തിരിക്കാനാണ് എല്ലാവരുടെയും ശ്രമം. ഈ ദിവസം സ്വീപ്പറിൽ 200ന് മുകളിലാണ് വെയ്റ്റിംഗ് ലിസ്റ്റ്. എ.സി ടിക്കറ്റും ലഭ്യമല്ല. ഏതാനം തത്ക്കാൽ ടിക്കറ്റുകൾ മാത്രമാണ് ലഭ്യം. തിങ്കളാഴ്ചകളിൽ സർവീസ് നടത്തുന്ന യശ്വന്ത്പൂർ മംഗലാപുരം എക്സ്പ്രസിന് (16565) വിഷുവിന് മുമ്പ് ഈമാസം ഏഴിനാണ് തിരൂരിലേക്ക് സർവീസുള്ളത്. വിഷു ലക്ഷ്യമാക്കി നാട്ടിലെത്തുന്നവർക്ക് ഈ ട്രെയിൻ പ്രയോജനപ്പെടില്ല.

ചെന്നൈയിൽ നിന്ന് പെടാപ്പാട്

ചെന്നൈയിൽ നിന്ന് തിരൂർ വഴി ദിവസം നാല് ട്രെയിനുകൾ സർവീസ് നടത്തുന്നുണ്ട്. വിഷു വരെ കേരളത്തിലേക്ക് ടിക്കറ്റില്ല. സ്ലീപ്പർ, തേർഡ് എ.സി, സെക്കൻഡ് എ.സി എന്നിവയിലൊന്നും ടിക്കറ്റില്ല. വൈകിട്ട് 4.20നുള്ള ചെന്നൈ സെൻട്രൽ - മംഗലാപുരം എക്സ്പ്രസ് (12685), രാത്രി 8.10ന് പുറപ്പെട്ട് രാവിലെ 6.25ന് തിരൂരിലെത്തുന്ന ചെന്നൈ - മംഗലാപുരം മെയിൽ (12601), ഉച്ചയ്ക്ക് 1.15ന് പുറപ്പെട്ട് രാത്രി 12.32ന് തിരൂരിലെത്തുന്ന വെസ്റ്റ് കോസ്റ്റ് എക്സ്പ്രസ് (22637), രാത്രി 11.15ന് ചെന്നൈ എഗ്മോറിൽ നിന്ന് പുറപ്പെട്ട് പിറ്റേന്ന് 1.28ന് തിരൂരിലെത്തുന്ന മംഗലാപുരം എക്സ്പ്രസ് ( 16,159) ട്രെയിനുകളിലും ഇതിനകം ടിക്കറ്റ് തീർന്നിട്ടുണ്ട്. ഉയർന്ന നിരക്കുള്ള തത്കാൽ, പ്രീമിയം തത്കാൽ ടിക്കറ്റുകൾ മാത്രമാണ് ഇനി ലഭിക്കുക. ഡൽഹി നിസാമുദ്ദീനിൽ നിന്നുള്ള മംഗള ലക്ഷദ്വീപ് എക്സ്പ്രസിലും ടിക്കറ്റില്ല.