ഗുജറാത്തിൽ വ്യോമസേനയുടെ യുദ്ധവിമാനം തകർന്നു വീണു,​ പൈലറ്റ് മരിച്ചു

ഗാന്ധി നഗർ : ഗുജറാത്തിലെ ജാംനഗറിൽ വ്യോമസേനയുടെ വിമാനം തകർന്നു വീണ് പൈലറ്റ് മരിച്ചു. സഹപൈലറ്റ് ഗുരുതര പരിക്കുകളോടെ രക്ഷപ്പെട്ടതായാണ് റിപ്പോർട്ട്. കഷണങ്ങളായി തകർന്നു വീണ വിമാനം പൂർണമായി കത്തിയമർന്നു. വിമാനാവശിഷ്ടങ്ങൾ കത്തുന്നതിന്റെ വീഡിയോ ദൃശ്യങ്ങൾ പുറത്തുവന്നു,​ അപകടത്തിന്റെ കാരണം കണ്ടെത്താനായിട്ടില്ല.

രാത്രി 9.51ഓടെയാണ് അപകടത്തെ കുറിച്ചുള്ള ആദ്യവിവരം പുറത്തുവന്നത്. അതിന് ശേഷം ഒരു സംഘം അപകടസ്ഥലത്തെത്തി. സംഭവത്തിൽ നാട്ടുകാർക്ക് പരിക്കേറ്റിട്ടില്ലെന്നും വിമാനം വയലിൽ തകർന്നു വീണതിനാൽ വലിയൊരു അപകടം ഒഴിവായതായും അധികൃതർ പറഞ്ഞു.