മദ്ധ്യവയസ്‌കനെ വെട്ടിക്കൊലപ്പെടുത്താൻ ശ്രമിച്ചയൾ പിടിയിലായി

കൊല്ലം: മദ്ധ്യവയസ്‌കനെ വെട്ടി കൊലപ്പെടുത്താൻ ശ്രമിച്ച കേസിലെ പ്രതി പൊലീസ് പിടിയിലായി. പള്ളിത്തോട്ടം വെളിച്ചം നഗർ-29ൽ സ്റ്റാലിനെയാണ് (37) പള്ളിത്തോട്ടം പൊലീസ് അറസ്റ്റ് ചെയ്യ്തത്. പള്ളിത്തോട്ടം സ്‌നേഹതീരം നഗർ സ്വദേശി നിഷാദിനെ (48) കൊലപ്പെടുത്താൻ ശ്രമിച്ച കേസിലാണ് അറസ്റ്റ്. പൊലീസ് പറയുന്നതിങ്ങനെ. ഈമാസം 13ന് ഉച്ചക്ക് 2 ഓടെ മദ്യപിച്ചെത്തിയ സ്റ്റാലിൻ പള്ളിത്തോട്ടത്തെ ഐസ് പ്ലാന്റിന് സമീപം നിൽക്കുകയായിരുന്ന നിഷാദുമായി വഴക്കുണ്ടാക്കി. ഇയാളെ പിന്തിരിപ്പിക്കാൻ ശ്രമിച്ചതോടെ പ്രകോപിതനായ പ്രതി സ്ഥലത്ത് നിന്ന് പോയ ശേഷം ഒരു വാളുമായി മടങ്ങിവന്ന് നിഷാദിനെ വെട്ടി പരിക്കേൽപ്പിക്കുകയായിരുന്നു. പ്രതിയുടെ ആക്രമണത്തിൽ നിഷാദിന്റെ തലയിലും നെറ്റിയിലും ആഴത്തിൽ മുറിവേറ്റിരുന്നു.

ഇൻസ്‌പെക്ടർ ഷഫീഖിന്റെ നേതൃത്വത്തിൽ എസ്.ഐമാരായ സ്വാതി, രാജീവൻ, എ.എസ്.ഐ മാരായ റജീന, സരിത, എസ്.സി.പി.ഒ മാരായ സാജൻ ജോസ്, മനോജ്, ശ്രീജിത്ത്, സി.പി.ഒ മാരായ വൈശാഖ്, സുജീഷ്, സാജൻ ജേക്കബ് എന്നിവരടങ്ങുന്ന സംഘമാണ് പ്രതിയെ പിടികൂടിയത്.