കണ്ണൂർ സർവകലാശാല ചോദ്യ പേപ്പർ ചോർച്ച : കോളേജിന്റെ അഫിലിയേഷൻ റദ്ദാക്കും

കണ്ണൂർ: കണ്ണൂർ സർവകലാശാല അവസാന സെമസ്​റ്റർ ബി.സി.എ പരീക്ഷയുടെ ചോദ്യങ്ങൾ കാസർകോട് പാലക്കുന്ന് ഗ്രീൻ വുഡ്സ് ആർട്സ് ആൻഡ് സയൻസ് കോളജിൽ നിന്ന് വിദ്യാർത്ഥികൾക്ക് ചോർത്തികൊടുത്ത സംഭവവുമായി ബന്ധപ്പെട്ട് കോളജിന്റെ അഫിലിയേഷൻ താൽക്കാലികമായി റദ്ദാക്കാൻ ഇന്നലെ ചേർന്ന സിൻഡിക്കേ​റ്റ് യോഗത്തിൽ തീരുമാനിച്ചു.

കോളജിന് പിഴയും ചുമത്തി. ചോദ്യപേപ്പർ ചോർത്തിയ പ്രിൻസിപ്പലിനെ പരീക്ഷ ചുമതലയിൽ നിന്ന് ഒഴിവാക്കാനും സിൻഡിക്കേ​റ്റ് യോഗത്തിൽ തീരുമാനമായി. ചോദ്യപേപ്പർ ചോർന്ന പരീക്ഷകൾ വീണ്ടും നടത്തും. പ്രിൻസിപ്പലിന്റെ നടപടിയുമായി ബന്ധപെട്ട് നടത്തിയ അന്വേഷണ റിപ്പോർട്ടിന് സിൻഡിക്കേ​റ്റ് അംഗീകാരം നൽകി. സിൻഡിക്കേ​റ്റ് ഉപസമിതിയുടെ ശുപാർശ പ്രകാരമാണ് തീരുമാനം. സംഭവത്തിൽ പ്രിൻസിപ്പൽ ഇൻ ചാർജ് പി. അജീഷിനെ കോളജ് സസ്‌പെൻഡ് ചെയ്തിട്ടുണ്ട്. ഒമ്പത് വിദ്യാർഥികൾ ഉൾപ്പെട്ട വാട്ടസ്ആപ്പ് ഗ്രൂപ്പിൽ പരീക്ഷയ്ക്ക് ഒരു മണിക്കൂർ മുമ്പാണ് പ്രിൻസിപ്പൽ ചോദ്യങ്ങൾ അയച്ചത്. ചോദ്യങ്ങൾ ചോർന്നതുമായി ബന്ധപ്പെട്ട് സിൻഡിക്കേ​റ്റ് സമിതി വിസിക്ക് റിപോർട്ട് കൈകമാറുകയും അജീഷിനെതിരേ പൊലീസ് കേസെടുക്കുകയും ചെയ്തിരുന്നു.