ഗൂഗിളിലെ കസ്റ്റമർ കെയർ നമ്പറിന്റെ മറവിലും തട്ടിപ്പ്

തിരുവനന്തപുരം: ഗൂഗിളിൽ തെരയുമ്പോൾ കിട്ടുന്ന വിവിധ കമ്പനികളുടെ അടക്കം കസ്റ്റമർ കെയർ നമ്പറിന്റെ മറവിലും തട്ടിപ്പ്. ഗൃഹോപകരണങ്ങൾ, മൊബൈൽ, ഇലക്ട്രിക് ഉത്പന്നങ്ങൾ എന്നിവ തകരാറിലാകുമ്പോഴും സേവനങ്ങൾ തടസപ്പെടുമ്പോഴും ഗൂഗിളിൽ തെരയുമ്പോൾ ആദ്യം പ്രത്യക്ഷപ്പെടുന്ന കസ്റ്റമർ സപ്പോർട്ട് നമ്പർ പലപ്പോഴും തട്ടിപ്പുകാരുടേതായിരിക്കുമെന്ന് സൈബർ വിദഗ്ദ്ധർ പറയുന്നു.

ഇവയിലേയ്ക്ക് വിളിക്കുമ്പോൾ വിശ്വസനീയമായ തരത്തിൽ തകരാർ പരിഹരിക്കുന്നതിനെക്കുറിച്ച് വിശദീകരിക്കും. ബാങ്ക് അക്കൗണ്ട് നമ്പർ, വൺടൈം സെക്യൂരിറ്റി കോഡ് തുടങ്ങിയ രഹസ്യവിവരങ്ങൾ ചോദിച്ചറിയും. ഇതിലൂടെ പണം തട്ടും. കൂടുതൽ അന്വേഷണത്തിനായി ഗൂഗിൾ ഫോം അയച്ചു നൽകും. ഇത് തുറക്കുമ്പോൾ സ്വകാര്യവിവരങ്ങൾ തട്ടിപ്പുകാർ കൈക്കലാക്കും.

പലപ്പോഴും ഗൂഗിളിൽ ആദ്യം നൽകിയിരിക്കുന്ന നമ്പറുകൾ തട്ടിപ്പുകാർ പരസ്യത്തിലൂടെയോ പെയ്ഡ് സ്പോൺസറിംഗിലൂടെയോ സൃഷ്ടിച്ചവയാകും. അല്ലെങ്കിൽ വ്യാജ വെബ്സൈറ്റുകൾ നിർമ്മിച്ച് ലിസ്റ്റ് ചെയ്യുന്നവയായിരിക്കും. ഗൂഗിൾ മാപ്പിലെ കോൺടാക്ട് വിവരങ്ങൾ തിരുത്തി ബാങ്കുകളുടെയും സ്ഥാപനങ്ങളുടെയും യഥാർത്ഥ നമ്പർ മാറ്റിയും തട്ടിപ്പ് നടത്തുന്നുണ്ട്.

സെർച്ച് എൻജിനുകൾക്ക് പുറമേ ഇ-മെയിൽ, മെസേജിംഗ് പ്ലാറ്റ്ഫോമുകൾ എന്നിവ വഴിയും വ്യാജനമ്പറുകൾ എത്തിക്കാറുണ്ട്.

ഗൂഗിളിൽ തെരയരുത്

കസ്റ്റമർ കെയർ നമ്പർ തേടി ആദ്യമേ ഗൂഗിളിൽ തെരയുന്നത് ഒഴിവാക്കണമെന്ന് സൈബർ പൊലീസ് പറയുന്നു. ഉപകരണത്തിന്റെ വാറന്റി കാർഡിൽ നൽകിയിരിക്കുന്ന നമ്പറിൽ വിളിക്കുകയോ സ്ഥാപനത്തിന്റെ ഔദ്യോഗിക വെബ്സൈറ്റിലുള്ള നമ്പർ ഉപയോഗിക്കുകയോ വേണം. ആപ്പിൾ അടക്കമുള്ള കമ്പനികളുടെയും ബാങ്കുകളുടെയും വ്യാജ നമ്പറുകൾവരെ സൈറ്റുകളിലുണ്ട്. ഇത് നീക്കാൻ ഗൂഗിൾ ഇടയ്ക്കിടെ ക്ലീൻ ഡ്രൈവ് നടത്തുമെങ്കിലും വീണ്ടും തട്ടിപ്പുകാർ രംഗത്തെത്തും.

1930

സൈബർ ഹെൽപ്പ് നമ്പർ