'വിവാഹ വിവരം വാട്‌സാപ്പ് ഗ്രൂപ്പ് വഴി ലീക്കായി, തീരുമാനിച്ചിരുന്നത് ഇങ്ങനെയൊന്നുമായിരുന്നില്ല'

ഡെപ്യൂട്ടി കളക്ടറുമായുള്ള തന്റെ വിവാഹത്തെക്കുറിച്ച് വെളിപ്പെടുത്തലുമായി ഐഷ സുല്‍ത്താന. വിവാഹ വിവരം പൊതുസമൂഹത്തെ അറിയിക്കണമെന്ന് തീരുമാനിച്ചിരുന്ന സമയത്തല്ല ഇക്കാര്യം എല്ലാവരും അറിഞ്ഞതെന്ന് ഒരു സ്വകാര്യ മാദ്ധ്യമത്തിന് അനുവദിച്ച അഭിമുഖത്തില്‍ ഐഷ വ്യക്തമാക്കി. ഡിസംബറില്‍ ഉമ്മ ഉംറ ചടങ്ങുകള്‍ നിര്‍വഹിക്കാനായി പോകുന്നുണ്ട്, അത് കഴിഞ്ഞ് മടങ്ങിയെത്തിയ ശേഷം എല്ലാവരേയും അറിയിക്കാനാണ് തീരുമാനിച്ചിരുന്നത്. എന്നാല്‍ വാട്‌സാപ്പ് ഗ്രൂപ്പ് വഴി തന്റേയും ഹര്‍ഷിത് സൈനിയുടേയും വിവാഹ വിവരം ലീക്കാകുകയായിരുന്നുവെന്നും ഐഷ പറഞ്ഞു.

ലക്ഷദ്വീപിലെ അന്ത്രോത്ത് അഗത്തി ദ്വീപുകളിലെ ഡെപ്യൂട്ടി കലക്ടറായിരുന്നു ഹര്‍ഷിത് സൈനി. തന്നെപ്പോലെ ലക്ഷദ്വീപില്‍ ഒരുപാട് ക്ഷേമപ്രവര്‍ത്തനം നടത്താന്‍ ആഗ്രഹമുള്ള ആളാണ് ഹര്‍ഷിത് സൈനിയെന്നും ഒരേ ചിന്താഗതിയുള്ള ആളുകള്‍ ഒരുമിച്ചാല്‍ നന്നാകുമെന്ന് തോന്നിയതുകൊണ്ടാണ് വിവാഹം കഴിച്ചതിനും ഐഷ സുല്‍ത്താന കൂട്ടിച്ചേര്‍ത്തു. റജിസ്റ്റര്‍ വിവാഹം നേരത്തെ തന്നെ കഴിഞ്ഞതാണ്. രണ്ട് വീട്ടുകാരും ഒരുമിച്ച് ആലോചിച്ച ശേഷം ഡിസംബറില്‍ ഒരു റിസപ്ഷന്‍ ചടങ്ങും ആലോചനയിലുണ്ടായിരുന്നുവെന്നും അവര്‍ പറയുന്നു.

അദ്ദേഹം ലക്ഷദ്വീപിന് വേണ്ടി ചെയ്യാന്‍ ഉദ്ദേശിക്കുന്ന കുറച്ചു കാര്യങ്ങള്‍ എന്നോട് പങ്കുവച്ചു. അത് കേട്ടപ്പോള്‍ ഞാന്‍ എന്താണ് ആഗ്രഹിക്കുന്നത് അതൊക്കെ ചെയ്യാന്‍ ആഗ്രഹമുള്ള എന്നെപ്പോലെ തന്നെ ചിന്തിക്കുന്ന ഒരാളാണ് അദ്ദേഹമെന്ന് മനസ്സിലായി. പിന്നീടാണ് പരസ്പരം ഇഷ്ടത്തിലായതും വിവാഹിതരായിമാറിയതെന്നും ഐഷ അഭിമുഖത്തില്‍ വ്യക്തമാക്കി. ഒരു ഔദ്യോഗിക ചടങ്ങില്‍ പങ്കെടുക്കുന്നതിനിടെയാണ് ഹര്‍ഷിത് രജിസ്റ്റര്‍ ചെയ്യാന്‍ എത്തിയതെന്നും അതിന് ശേഷം തിരികെ അതേ സ്ഥലത്തേക്ക് പോകുകയാണ് വിവാഹദിവസം സംഭവിച്ചതെന്നും ഐഷ സുല്‍ത്താന പറഞ്ഞു.