ജീൻസ് പതിവായി കഴുകാതെ ഉപയോഗിക്കാറുണ്ടോ? എങ്കിൽ പണികിട്ടാൻ വേറെയൊന്നും വേണ്ട

ഈ കാലഘട്ടത്തിൽ വളരെ ജനപ്രിയമായ വസ്ത്രങ്ങളിൽ ഒന്നാണ് ജീൻസ്. സ്ത്രീകളും പുരുഷന്മാരും കുട്ടികളും ഒരുപോലെ ഉപയോഗിക്കുന്ന ജീൻസ് ധരിക്കാൻ വളരെ എളുപ്പവും സുഖപ്രദവുമാണ്. എന്നാൽ പലരും ദിവസങ്ങളോളം ജീൻസ് കഴുകാതെ ഉപയോഗിക്കുന്നു. അതിന് കാരണം ഇടയ്ക്കിടെ കഴുകുന്നത് ജീൻസ് വേഗം നരയ്ക്കാൻ കാരണമാകുമെന്നതാണ്. മാത്രമല്ല നല്ല ഭാരമായതിനാൽ കഴുകാനും പാടാണ്. എന്നാൽ നാലിൽ കൂടുതൽ തവണ ഇട്ടശേഷം ജീൻസ് കഴുകാതെ ഉപയോഗിക്കുന്നത് ചർമ്മത്തിന് ദോഷമാണെന്നാണ് വിദഗ്ധർ പറയുന്നത്. നാല് തവണ ഉപയോഗിച്ച ശേഷം ജീൻസ് കഴുകാം. എന്നാൽ ഒരേ ജീൻസുകൾ തുടരെ ഉപയോഗിക്കരുത്.

ഉദാഹരണത്തിന് ഇന്ന് ജീൻസ് ധരിച്ചാൽ അത് അടുത്ത ദിവസം ധരിക്കരുത്. പകരം വെയിലത്തിട്ട് നല്ലപോലെ ഉണക്കി എടുത്തശേഷം വേണം ഉപയോഗിക്കാൻ. എങ്കിലേ അതിലെ രോഗാണുക്കൾ നശിക്കുകയുള്ളൂ. ചർമ്മ പ്രശ്നങ്ങൾ ഉള്ളവർ ഇടയ്ക്കിടെ ജീൻസ് കഴുകുക. അതുപോലെ തന്നെ ഓരോ തവണ ഉപയോഗിച്ച ശേഷവും കറയുള്ള ഭാഗം മാത്രം കഴുകി ഉണക്കുന്നതാണ് നല്ലത്. കൂടാതെ ജീൻസ് കഴുകുമ്പോൾ കഴിവതും കെെ കൊണ്ട് അലക്കാൻ ശ്രമിക്കുക. വളരെ കാലം ജീൻസിന്റെ പുതുമ നിലനിർത്താൻ ഇത് സഹായിക്കും.

വാഷിംഗ് മെഷീനിൽ അലക്കുന്നത് ജീൻസ് പെട്ടെന്ന് നശിക്കാൻ കാരണമാകും. ജീൻസ് അലക്കുന്ന വെള്ളത്തിൽ അൽപം വിനാഗിരി ഒഴിച്ചാൽ വസ്ത്രത്തിന്റെ നിറം മങ്ങുന്നത് തടയാം. കൂടാതെ ജീൻസ് കഴുകുമ്പോൾ പുറംതിരിച്ചിട്ട് കഴുകുന്നതാണ് നല്ലത്. ഉണക്കാൻ ഇടുന്നതും പുറംതിരിച്ച് വേണം. ഇല്ലെങ്കിൽ നിറം വേഗം മങ്ങിപോകും.