ഓപ്പൺ യൂണിവേഴ്സിറ്റി യു.ജി /പി.ജി അഡ്മിഷന് നാളെ വരെ അപേക്ഷിക്കാം

കൊല്ലം: ശ്രീനാരായണഗുരു ഓപ്പൺ യൂണിവേഴ്സിറ്റിയുടെ 2025-26 അദ്ധ്യയന വർഷത്തെ യു.ജി/പി.ജി പ്രോഗ്രാമുകൾക്ക് ഓൺലൈനായി നാളെ വരെ അപേക്ഷിക്കാം. 16യു.ജി പ്രോഗ്രാമുകളും 12പി.ജി പ്രോഗ്രാമുകളുമാണുള്ളത്. ഇതിൽ ആറ് പ്രോഗ്രാമുകൾ നാലുവർഷ ബിരുദ ഘടനയിലാണ്. നാല് വർഷ ഓണേഴ്സ് ബിരുദത്തിന് ചേരുന്നവർക്ക് മൂന്ന് വർഷം കഴിഞ്ഞാൽ നിശ്ചിത ക്രെഡിറ്റ് ലഭിക്കുന്ന മുറയ്ക്ക് ഡിഗ്രി സർട്ടിഫിക്കറ്റോട് കൂടി എക്സിറ്റ് ഓപ്ഷനുണ്ട്.

പഠന കേന്ദ്രങ്ങളിലൂടെ അവധി ദിവസങ്ങളിൽ നേരിട്ടുള്ള അക്കാഡമിക് കൗൺസലിംഗ് ക്ലാസുകൾക്ക് പുറമെ റെക്കോർഡഡ് ക്ലാസുകളും, എൽ ഡസ്ക് എന്ന പഠന ആപ്പും പഠിതാക്കൾക്ക് പ്രയോജനപ്പെടുത്താം. സെൽഫ് ലേർണിംഗ് മെറ്റീരിയലുകൾ, ഓൺലൈൻ പഠന സാമഗ്രികൾ എന്നിവയും പഠനം സുഗമമാക്കും. മിനിമം യോഗ്യതയുള്ള ആർക്കും പ്രായപരിധിയോ മാർക്ക്‌ മാനദണ്ഡങ്ങളോ ഇല്ലാതെ ഉപരി പഠനം നടത്താം. ടി.സി നിർബന്ധമല്ല.സംസ്ഥാന സാക്ഷരത മിഷന്റെ "സാക്ഷരതയിൽ നിന്ന് ഉന്നത വിദ്യാഭ്യാസത്തിലേക്ക്" എന്ന തുടർ വിദ്യാഭ്യാസ പദ്ധതിയിൽ കൂടിയും ഓപ്പൺ യൂണിവേഴ്സിറ്റിയിൽ അഡ്മിഷനെടുക്കാം. ഇതിനായി ജില്ലാ സാക്ഷരത മിഷൻ ഓഫീസുമായി ബന്ധപ്പെടണം. നിലവിൽ ഒരു അക്കാഡമിക് പ്രോഗ്രാം ചെയ്യുന്നവർക്കും യൂണിവേഴ്സിറ്റിയുടെ മറ്റൊരു ഡിഗ്രി പ്രോഗ്രാമിന് ഒരേ സമയം പഠിക്കാൻ സാധിക്കും. യു.ജി.സി മാനദണ്ഡപ്രകാരമാണ് ഡ്യൂവൽ ഡിഗ്രി സംവിധാനം നടപ്പാക്കിയിരിക്കുന്നത്. വിവരങ്ങൾക്ക് www.sgou.ac.in. ഫോൺ: 0474 2966841, 9188909901, 9188909902,