ആശുപത്രി കെട്ടിടം പൊളിക്കില്ല; മയിലാടുതുറൈയിൽ സമാധാനം

ചെന്നൈ: മയിലാടുതുറൈയിൽ ധർമ്മപുരം അഥീനം നിർമ്മിച്ച സൗജന്യ ചികിത്സാ കേന്ദ്രം പൊളിക്കില്ലെന്ന് മുനിസിപ്പൽ കമ്മീഷണറുടെ കത്ത് ലഭിച്ചതിനെത്തുടർന്ന്, ഗുരുമഹാ സന്നിധാനം മസിലാമണി ദേശിക ജ്ഞാനസംബന്ധ പരമാചാര്യ സ്വാമികൾ നിരാഹാര സമരം പിൻവലിക്കുന്നതായി പ്രഖ്യാപിച്ചു.

പ്രദേശത്ത് സർക്കാർ ആശുപത്രികളൊന്നുമില്ലാതിരുന്ന കാലത്താണ് ധർമ്മപുരം അഥീനം 1943ൽ 24ാമത് ഗുരുമഹാ സന്നിധാനം ഷൺമുഖദേശിക സ്വാമികൾ ആശുപത്രി നിർമ്മാണം ആരംഭിച്ചത്. 1951മുതൽ ഇവിടെ നിന്നും സൗജന്യചികിത്സ നാട്ടുകാർക്ക് ലഭിച്ചു.

പ്രധാനമായും പ്രസവചികിത്സയാണ് നൽകിയത്. പിന്നീട്, ആശുപത്രി മുനിസിപ്പാലിറ്റിക്ക് കൈമാറി. കെട്ടിടം ജീർണാവസ്ഥയിലായതിനെത്തുടർന്ന്, കൊട്ടൈനാട് ഒരു പ്രാഥമികാരോഗ്യ കേന്ദ്രം നിർമ്മിക്കുകയും ചികിത്സ അങ്ങോട്ടു മാറ്റുകയും ചെയ്തു. തുടർന്ന് സൗജന്യ ആശുപത്രി കെട്ടിടം അടച്ചുപൂട്ടി.

ശരിയായ അറ്റകുറ്റപ്പണികൾ നടത്താത്തതിനാൽ കെട്ടിടം ജീർണാവസ്ഥയിലായി. ഇതിനെത്തുടർന്ന്, ധർമ്മപുരം അധാമത്തിന്റെ 27ാമത് മഠാധിപതിയായ ശ്രീലശ്രീ മസിലാമണി ദേശിക ജ്ഞാനസംബന്ധ പരമാചാര്യ സ്വാമികൾ, കെട്ടിടം തങ്ങൾക്ക് കൈമാറണമെന്ന് ആവശ്യപ്പെട്ട് മുനിസിപ്പൽ ഭരണകൂടത്തിനും തമിഴ്നാട് സർക്കാരിനും ഒരു കത്ത് എഴുതിയിരുന്നു.

ഇതിന് മറുപടി ലഭിക്കാത്തപ്പോൾ, കെട്ടിടം പൊളിക്കാൻ പോകുകയാണെന്ന് വിവരം ലഭിച്ചു. ഇതിനെത്തുടർന്ന്, തങ്ങളുടെ പൂർവ്വികർ നിർമ്മിച്ച സ്മാരക ഘടന സംരക്ഷിക്കാൻ മരണം വരെ നിരാഹാരം കിടക്കുമെന്ന് സ്വാമികൾ പറഞ്ഞിരുന്നു. ഇതിനുശേഷം, കെട്ടിടം പൊളിക്കുന്നത് നിർത്തിവച്ചിരുന്നു. വീണ്ടും പൊളിക്കാൻ നീക്കം നടത്തിയപ്പോൾ 'ജീവൻ നഷ്ടപ്പെടുന്നതുവരെ ഞങ്ങൾ നിരാഹാര സമരം നടത്തും' എന്ന് അദ്ദേഹത്തിന്റെ പ്രഖ്യാപനം വലിയ കോളിളക്കം സൃഷ്ടിച്ചു.

ബി.ജെ.പി സംസ്ഥാന പ്രസിഡന്റ് നൈനാർ നാഗേന്ദ്രൻ, മുൻ പ്രസിഡന്റ് അണ്ണാമലൈ, വിവിധ സംഘടനകൾ എന്നിവർ അഥീനത്തിന്റെ പ്രഖ്യാപനത്തിന് പിന്തുണ അറിയിച്ചു.

തുടർന്ന് മുഖ്യമന്ത്രി എം.കെ.സ്റ്റാലിനും മന്ത്രിമാരായ ശേഖർ ബാബുവും കെ.എൻ.നെഹ്റുവും ഇടപെട്ടതോടെയാണ് മുനിസിപ്പാലിറ്റി തീരുമാനം മാറ്റി.

 എന്താണ് ധർമ്മപുരം അഥീനം?

ശൈവ സിദ്ധാന്തത്തിന്റെ തത്ത്വചിന്ത പ്രചരിപ്പിക്കുന്നതിനായി പതിനാറാം നൂറ്റാണ്ടിൽ സ്ഥാപിതമായ തമിഴ്നാട്ടിലെ മയിലാടുതുറൈയിലുള്ള ഒരു പ്രമുഖ ശൈവ സന്യാസ സ്ഥാപനമാണ് ധർമ്മപുരം അധീനം.