ഇ.ഡി സമൻസ് മുഖ്യമന്ത്രി ഒതുക്കി: സണ്ണി ജോസഫ്

പാലക്കാട്: മകനെതിരായ ഇ.ഡി സമൻസ് മുഖ്യമന്ത്രിയുടെ ദുഃസ്വാധീനം ഉപയോഗിച്ച് ഒതുക്കിയെന്ന് കെ.പി.സി.സി പ്രസിസന്റ് സണ്ണി ജോസഫ് എം.എൽ.എ. ഇനിയങ്ങനെയല്ലെന്ന് തെളിയിക്കാൻ മുഖ്യമന്ത്രിയെ വെല്ലുവിളിക്കുന്നു. മുഖ്യമന്ത്രിയും കേന്ദ്രസർക്കാരും ചേർന്ന രാഷ്ട്രീയ ഒത്തുതീർപ്പിന്റെ ഭാഗമായാണത് ഒതുക്കിയത്. അതെന്തിനായിരുന്നുവെന്ന് ജനങ്ങൾക്ക് അറിയണം. ഈ വിഷയത്തിൽ വ്യക്തമായ മറുപടി നൽകാതെ മുഖ്യമന്ത്രി വാർത്താസമ്മേളനത്തിൽ ഉരുണ്ടുകളിക്കുകയായിരുന്നു. ആദ്യ സമൻസ് കൈപ്പറ്റിയിട്ടില്ലെങ്കിൽ ഒരിക്കൽക്കൂടി അയയ്ക്കുകയും അതിന് ശേഷവും കൈപ്പറ്റിയില്ലെങ്കിൽ വാറണ്ട്, അറസ്റ്റ് തുടങ്ങിയവയാണ് നടപടിക്രമം. എന്നാൽ, ഇതിൽ എന്തു നടപടിയെടുത്തെന്ന് അറിയാൻ പൗരൻമാർക്ക് അവകാശമുണ്ട്. അത് ഇ.ഡിയും മുഖ്യമന്ത്രിയും വ്യക്തമാക്കണം.