നെടുങ്കണ്ടം താലൂക്ക് ആശുപത്രി നിർമ്മാണം 15 ദിവസത്തിനുള്ളിൽ തീർക്കാൻ നിർദേശം 

ഇടുക്കി: നെടുങ്കണ്ടം താലൂക്ക് ആശുപത്രിയുടെ നിർമ്മാണവുമായി ബന്ധപ്പെട്ട് കരാറുകാരന് പതിനഞ്ച് ദിവസത്തെ സമയം കൂടി നൽകാൻ മന്ത്രി വീണാ ജോർജിന്റെ നേതൃത്വത്തിൽ ചേർന്ന അവലോകന യോഗത്തിൽ തീരുമാനം. ആവശ്യത്തിന് ജോലിക്കാരെ നിയോഗിച്ച് നിർമ്മാണം വേഗത്തിലാക്കിയില്ലെങ്കിൽ കരാർ റദ്ദാക്കി കമ്പനിയെ കരിമ്പട്ടികയിൽ ഉൾപ്പെടുത്തും. പ്രതിദിനം 150 മുതൽ 200വരെ ജോലിക്കാരെ നിയോഗിച്ച് നിർമ്മാണം വേഗത്തിലാക്കാനും മന്ത്രി നിർദേശം നൽകി. നെടുങ്കണ്ടം താലൂക്ക് ആശുപത്രിയിലെ ഒ.പി ബ്ലോക്കുകളുടെ നിർമ്മാണ പുരോഗതി മന്ത്രി നേരിട്ട് വിലയിരുത്തി.

=149 കോടി രൂപ കിഫ്ബി തുക ഉപയോഗിച്ചാണ് നിർമ്മാണം. നിർമ്മാണവുമായി ബന്ധപ്പെട്ട് നിലവിലെ കരാറുകാരനെ ടെർമിനേറ്റ് ചെയ്യാൻ കിഫ്ബ് തീരുമാനിക്കുകയും തുടർ നടപടി സ്വീകരിക്കുകയും ചെയ്തിരുന്നു. കരാറുകാരൻ കോടതി സമീപിക്കുകയും അവരെ നിലനിർത്തണമെന്ന് ആവശ്യപ്പെടുകയും ചെയ്തിരുന്നു. ഇതേ തുടർന്ന് കോടതി വിധിയുടെ അടിസ്ഥാനത്തിൽ കരാറുകാർ നിർമ്മാണം തുടരുകയായിരുന്നു.

അടിസ്ഥാന സൗകര്യ

വികസനത്തിനായി 149 കോടി

സംസ്ഥാന സർക്കാർ അടിസ്ഥാന സൗകര്യ വികസനത്തിനായി നെടുങ്കണ്ടം താലൂക്ക് ആശുപത്രിക്കു വേണ്ടി പ്രത്യേകമായി അനുവദിച്ചതാണ് 149 കോടി രൂപ. എം.എം മണി മന്ത്രിയായിരുന്ന ഘട്ടത്തിലാണ് പദ്ധതി അനുവദിച്ചത്. സംസ്ഥാനത്ത് ഏറ്റവുമധികം തുക അനുവദിക്കപ്പെട്ടിട്ടുള്ള ആശുപത്രികളിൽ ഒന്നാണിത്. ഒ.പി ബ്ലോക്കും കാഷ്വാലിറ്റി ബ്ലോക്കുമാണ് നിർമ്മാണം പുരോഗമിക്കുന്നത്. കരാറുകാരന് ഒരു ബില്ലുപോലും കിഫ്ബിയിൽ നിന്ന് മാറിനൽകാനില്ലെന്ന് മന്ത്രി പറഞ്ഞു. കരാറുകാരൻ സാമ്പത്തിക പ്രതിസന്ധിയുണ്ട് എന്ന് വ്യക്തമാക്കിയതിന്റെ അടിസ്ഥാനത്തിൽ നേരിട്ട് നിർമ്മാണ സാമഗ്രികൾ ഇറക്കി നൽകുന്നതിനായി കിഫ്ബി, സ്‌പെഷ്യൽ പർപ്പസ് വെഹിക്കിളായ ഹൈറ്റ്സ് (എച്ച്.എൽ.എൽ ഇൻഫ്രാ ടെക് സർവീസസ് ലിമിറ്റഡ്), കരാർ കമ്പനി എന്നിവർ ചേർന്ന് ത്രികക്ഷി കരാറിലേർപ്പെട്ടിട്ടുണ്ട്. ഇത്തരം ത്രികക്ഷി കരാറിൽ കിഫ്ബ് ഏർപ്പെടുന്നത് സംസ്ഥാനത്ത് തന്നെ ഒന്നോ രണ്ടോ സ്ഥലങ്ങളിൽ മാത്രമാണെന്ന് മന്ത്രി പറഞ്ഞു. എത്രയും വേഗം നിർമ്മാണം പൂർത്തീകരിച്ച് മലയോര മേഖലയിലെ ജനങ്ങൾക്ക് ആശുപത്രിയുടെ സേവനം ലഭ്യമാക്കുകയാണ് ലക്ഷ്യം. എം.എം. മണി എംഎൽഎ അദ്ധ്യക്ഷത വഹിച്ചു. നെടുങ്കണ്ടം ബ്ലോക്ക് പഞ്ചായത്ത് പ്രസിഡന്റ് കെ.ടി. കുഞ്ഞ്, നെടുങ്കണ്ടം ഗ്രാമപഞ്ചായത്ത് പ്രസിഡന്റ് പ്രീമി ലാലിച്ചൻ, ബ്ലോക്ക് പഞ്ചായത്തംഗം വിജയകുമാരി എസ് .ബാബു, ജില്ലാ മെഡിക്കൽ ഓഫീസർ ഡോ. കെ.എൻ. സതീഷ്, താലൂക്ക് ആശുപത്രി സൂപ്രണ്ട് ശരൺ ജോസഫ്, ജില്ലാ പ്രോഗ്രാം മാനേജർ ഡോ. ഇ.കെ. ഖയസ്, ഡയറക്ടറേറ്റ് ഓഫ് ഹെൽത്ത് സർവീസസ് അസിസ്റ്റന്റ് ഡയറക്ടർ (പ്ലാനിംഗ്) ഡോ. സുകേഷ് രാജ്, ജൂനിയർ അഡ്മിനിസ്‌ട്രേറ്റീവ് മെഡിക്കൽ ഓഫീസർ (പ്ലാനിംഗ്) ഡോ. വി.എൻ. വിനീത്, ജൂനിയർ അഡ്മിനിസ്‌ട്രേറ്റീവ് മെഡിക്കൽ ഓഫീസർ ഡോ. സരുൺ ഘോഷ് തുടങ്ങിയവർ പങ്കെടുത്തു.

നിർമ്മാണം നടക്കുന്ന നെടുങ്കണ്ടം താലൂക്ക് ആശുപത്രി ആരോഗ്യ മന്ത്രി വീണാ ജോർജ് സന്ദർശിക്കുന്നു. എംഎം മണി എം.എൽ.എ സമീപം.