കുപ്രസിദ്ധ ലഹരി കടത്തുകാരി റോമ ആരിഫ് ഷെയ്ഖ് അറസ്റ്റിൽ; അറിയപ്പെടുന്നത് മയക്കുമരുന്ന് രാജ്ഞി

മുംബയ് :കുപ്രസിദ്ധ മയക്കുമരുന്ന് കടത്തുകാരി റോമ ആരിഫ് ഷെയ്ഖ് എന്ന 'പഗ്ലി' (37) പിടിയിൽ. മെഫെഡ്രോൺ (എംഡി) കടത്തിയ കേസിൽ മുംബയിലെ ആന്റി-നാർക്കോട്ടിക്‌സ് സെൽ (ANC) ആണ് ഇവരെ പിടികൂടി ഒരു വർഷത്തേക്ക് ജയിലിലേക്ക് മാറ്റിയത്. നാർക്കോട്ടിക് ഡ്രഗ്‌സ് ആന്റ് സൈക്കോട്രോപിക് സബ്സ്റ്റൻസസ് (എൻഡി‌പിഎസ് ) നിയമപ്രകാരം എട്ട് കേസുകൾ നിലവിൽ റോമയ്ക്കെതിരെയുണ്ട്. മുംബയിൽ പ്രവർത്തിക്കുന്ന മയക്കുമരുന്ന് ശൃംഖലയുടെ പ്രധാന കണ്ണിയാണ് റോമയെന്നും അന്വേഷണസംഘം കണ്ടെത്തി.

നേരത്തെ റോമയ്‌ക്കെതിരെ കരുതൽ നടപടി സ്വീകരിച്ചിരുന്നു. എന്നാൽ ജയിൽ മോചിതയായ ഉടൻ തന്നെ റോമ വീണ്ടും മയക്കുമരുന്ന് കച്ചവടം പുനഃരാരംഭിക്കുകയായിരുന്നു. ഇതിനെത്തുടർന്ന് ആന്റി-നാർക്കോട്ടിക്‌സ് സെൽ (എഎൻസി) മയക്കുമരുന്ന് കള്ളക്കടത്ത് തടയൽ നിയമ പ്രകാരം റിപ്പോർട്ട് തയ്യാറാക്കി. ഈ റിപ്പോർട്ട് മുംബയ് പൊലീസ് മഹാരാഷ്ട്ര സർക്കാരിന്റെ ആഭ്യന്തര വകുപ്പിന് സമർപ്പിച്ചു. റിപ്പോർട്ടിന് അംഗീകാരം ലഭിച്ചതോടെ ചൊവ്വാഴ്ചയാണ് റോമയ്ക്ക് തടങ്കൽ ഉത്തരവ് നൽകുകയും മഹാരാഷ്ട്രയിലെ കോലാപൂർ ജയിലിലേക്ക് മാറ്റുകയും ചെയ്തത്.