എതിർപ്പുള്ളവരെ നശിപ്പിക്കാനുള്ളതല്ല, പിന്നെയെന്തിനാണ് ശത്രുസംഹാര പൂജയെന്നറിയുമോ?​

ഓരോ മനുഷ്യർക്കും എതിർപ്പുള്ളവരും ശത്രുതയുള്ളവരും ധാരാളമുണ്ടാകും. ഇവരുടെ ശല്യം ഒഴിവാക്കണമെന്ന് എല്ലാവർക്കും ആഗ്രഹമുണ്ടാകും. നല്ലതിനായി നമ്മൾ ക്ഷേത്രത്തിൽ കഴിപ്പിക്കുന്ന വഴിപാടുകളിൽ ചിലത് ഇത്തരത്തിലാണെന്ന് തെറ്റിദ്ധാരണയുണ്ട്. ഇതിൽ പ്രധാനമാണ് ശത്രുസംഹാര പൂജ അഥവാ ശത്രുസംഹാര പുഷ്‌പാഞ്ചലി. പേരിൽ ശത്രുവുണ്ടെന്ന് കരുതി ഈ വഴിപാട് ഏതെങ്കിലും ശത്രുവിനെതിരെയുള്ളതല്ല. നമ്മുടെ ഉള്ളിൽതന്നെ നമുക്കെതിരായ ചില വികാരങ്ങളുണ്ട്. ആ വികാരങ്ങളായ ശത്രുക്കളെ നേരിടാനാണ് ഈ വഴിപാട്.

കാമം,​ ക്രോധം,​ മോഹം,​ ലോഭം,​ മദമാത്സര്യങ്ങൾ എന്നിവയാണ് നമ്മുടെ ശത്രുക്കൾ. ഇവയെ നിയന്ത്രിക്കുമ്പോൾ ഓരോ മനുഷ്യനും ജീവിതം മികവുറ്റതാകും. നാം വസിക്കുന്ന ഭൂമിയും നമ്മുടെ ശരീരവുമെല്ലാം ഒന്നാണെന്ന ഭാവമാണ് ആചാര്യന്മാർ പഠിപ്പിച്ചത്. ഈ ഭാവത്തിന് മാറ്റംവരുമ്പോഴാണ് മുകളിൽ പറഞ്ഞ ചിന്തകൾ വരുന്നത്. ഇതുവഴി മറ്റുള്ളവരോട് അനാവശ്യമായ കോംപ്ളക്‌സുകളോ എതിർപ്പുകളോ അസൂയയോ ഒക്കെവരാം. ഇത് ഉന്മൂലനം ചെയ്യാനാണ് ശത്രുസംഹാര പൂജ നടത്തുന്നത്. ഓരോ മനുഷ്യർക്കും ഓരോ മോശം ദശാപഹാരങ്ങളുണ്ടാകും. ഈ കാലത്ത് അവ നമ്മെ നശിപ്പിക്കാതിരിക്കാനാണ് ശത്രുസംഹാര പൂജ.

ഐശ്വര്യം,​ യശസ്,​ വീര്യം എന്നിങ്ങനെ ആറോളം ഗുണങ്ങൾക്ക് വേണ്ടി ഷഡ്‌വൈരികളായ ദോഷങ്ങളെ അകറ്റാനാണ് ഈ പൂജ നടത്തേണ്ടത്. തമിഴ്‌നാട്ടിലെ മുരുകന്റെ ആറ് പടൈ വീടുകളിൽ പ്രധാനമായ തിരുച്ചെന്തൂർ മുരുകൻ ക്ഷേത്രത്തിൽ ശത്രുസംഹാര പൂജകൾ ചെയ്യാറുണ്ട്. ഗ്രഹദോഷം,​ ദൃഷ്‌ടിദോഷം,​ ശാപം ഇവ അകലാനും ഭയം,​ കടബാദ്ധ്യത,​ മനോരോഗങ്ങൾ ഇവ മാറാനും ഇവിടെ പൂജ കഴിക്കുക പ്രധാനമാണ്. ക്ഷേത്രത്തിന് പടിഞ്ഞാറ് ശത്രുസംഹാര മൂർത്തി ക്ഷേത്രത്തിലാണ് ഇത് ചെയ്യുന്നത്.