കൊല്ലത്ത് കായലിൽ നങ്കൂരമിട്ട ബോട്ടുകൾ കത്തിനശിച്ചു; രണ്ട് തൊഴിലാളികൾക്ക് പരിക്ക്

കൊല്ലം: കാവനാട് മത്സ്യബന്ധന ബോട്ടുകൾക്ക് തീപിടിച്ച് രണ്ട് തൊഴിലാളികൾക്ക് പൊള്ളലേറ്റു. മുക്കാട് കായലിൽ നങ്കൂരമിട്ട് കിടന്ന രണ്ട് ബോട്ടുകൾക്കാണ് തീപിടിച്ച് കത്തിനശിച്ചത്. ആന്ധ്രാപ്രദേശ് സ്വദേശികളായ രാജു, അശോക് എന്നിവർക്കാണ് പൊള്ളലേറ്റത്. പാചക​ ​ഗ്യാസിൽ നിന്ന് തീ പടർന്നതാകാം അപകടത്തിന് കാരണമെന്നാണ് പ്രാഥമിക നി​ഗമനം.

തീപിടിത്തം ഉണ്ടായതോടെ ബോട്ടുകളുടെ കെട്ടഴിച്ചു വിട്ടു. അതിനാൽ കൂടുതൽ ബോട്ടുകളിലേക്ക് തീ പടരുന്നത് ഒഴിവായി. തീയണക്കാൻ ഫയർഫോഴ്സ് ശ്രമം നടത്തുകയാണ്. കായലിനെ നടുഭാഗം ആയതിനാൽ ഫയർഫോഴ്സ് വാഹനം എത്തിക്കാൻ കഴിഞ്ഞില്ല. പ്രദേശത്തെ ഐസ് പ്ലാന്‍റിൽ നിന്നുള്ള വെള്ളം ഉപയോഗിച്ചാണ് തീയണക്കാൻ ശ്രമം തുടരുന്നത്. ബോട്ടുകൾ സെന്റ് ജോർജ് തുരുത്തിൽ ചെന്ന് അടിഞ്ഞിരിക്കുകയാണ്.