ചന്ദന കടത്തിലെ അറസ്റ്റ് ഉദ്യോഗസ്ഥർക്ക് വധഭീഷണിയെന്ന് വനം ഇന്റലിജൻസ്

തിരുവനന്തപുരം: 10 ലക്ഷത്തിന്റെ 66 കിലോഗ്രാം ചന്ദനവുമായി എറണാകുളം,ഇടുക്കി ജില്ലകളിൽ നിന്ന് 5 പേരെ പിടികൂടിയ വനംവകുപ്പ് ഉദ്യോഗസ്ഥർക്ക് വധഭീഷണി. മലയാറ്റൂർ ഡിവിഷനിലെ മേക്കപ്പാല ഫോറസ്റ്റ് സ്റ്റേഷൻ പരിധിയിലുള്ള ഇരട്ടയാറിൽ പ്രതികളുമായി തെളിവെടുപ്പിന് എത്തിക്കുമ്പോൾ ഉദ്യോഗസ്ഥരെ അപായപ്പെടുത്തുമെന്നാണ് ചന്ദനമാഫിയയിൽ നിന്ന് വനംവകുപ്പ് ഇന്റലിജൻസിന് ലഭിച്ച ഭീഷണി. തെളിവെടുപ്പിനായി സായുധ പൊലീസിന്റെ സംരക്ഷണമൊരുക്കണമെന്ന് ഉദ്യോഗസ്ഥർ ആവശ്യപ്പെട്ടു.

ഇരട്ടയാറിലെ ആളൊഴിഞ്ഞ പറമ്പിൽനിന്ന് നവംബർ 21നാണ് വില്പനയ്ക്കായി മൂന്ന് ചാക്കുകെട്ടുകളിൽ സൂക്ഷിച്ചിരുന്ന 66 കിലോ ചന്ദനമരം പിടികൂടിയത്. തുടർന്ന് ഇരട്ടയാർ സ്വദേശികളായ ചാർലി ജോസഫ്,നിഖിൽ സുരേഷ്,കട്ടപ്പന സ്വദേശി സരൺ ശശി,രാജാക്കാട് സ്വദേശി വി.എസ്.ഷാജി,ഉടുമ്പഞ്ചോല സ്വദേശി അനീഷ് മാത്യു എന്നിവരെ എറണാകുളം,ഇടുക്കി ജില്ലികളിൽ നിന്നായി പിടികൂടുകയായിരുന്നു. ഇവർ വിസ തട്ടിപ്പ്,ലഹരി കടത്ത്,ഗുണ്ടാ ആക്രമണം തുടങ്ങിയ ക്രിമിനൽ കേസുകളിൽ പ്രതികളാണ്. ചന്ദനക്കടത്ത് നടത്തുന്ന അന്തർ സംസ്ഥാന സംഘങ്ങളുമായി പ്രതികൾക്ക് ബന്ധമുള്ളതായും കണ്ടെത്തി.

ഉദ്യോഗസ്ഥർക്ക് വധഭീഷണിയുണ്ടെന്ന മുന്നറിയിപ്പിന്റെ അടിസ്ഥാനത്തിൽ സ്ഥിതിഗതികൾ പരിശോധിച്ചുവരികയാണ്. സായുധ പൊലീസിന്റ സംരക്ഷണം ഏർപ്പെടുത്തണമെന്ന ആവശ്യം പരിശോധിക്കും

-കാർത്തിക്,​ ഡി.എഫ്.ഒ,​

മലയാറ്റൂർ വനം ഡിവിഷൻ