ഡിവൈ.എസ്.പി ഉമേഷിന് സസ്‌പെൻഷൻ

തിരുവനന്തപുരം: അനാശാസ്യത്തിന് പിടികൂടിയ യുവതിയെ പീഡിപ്പിച്ചെന്ന പരാതിയിൽ വടകര ഡിവൈ.എസ്.പി എ. ഉമേഷിനെ ഒടുവിൽ സർക്കാർ സസ്‌പെൻഡ് ചെയ്തു. പാലക്കാട് എസ്.പി അജിത് കുമാറിന്റെ അന്വേഷണ റിപ്പോർട്ടിനെ തുടർന്നുള്ള ഡി.ജി.പിയുടെ ശുപാർശയിലാണ് നടപടി. ഉമേഷിനെതിരെ ബലാത്സംഗകുറ്റം ചുമത്തി കേസെടുക്കാനും നീക്കമുണ്ട്.

പൊലീസിന് ഏറെ മാനക്കേടുണ്ടാക്കിയ കേസിലാണ് കേരള സീനിയർ പൊലീസ് അസോസിയേഷൻ സംസ്ഥാന നേതാവുകൂടിയായ എ. ഉമേഷിനെ സസ്‌പെൻഡ് ചെയ്‌തത്. ജീവനൊടുക്കിയ ചെർപ്പുളശേരി എസ്.എച്ച്.ഒ ബിനു തോമസിന്റെ ആത്മഹത്യാകുറിപ്പിലാണ് ഉമേഷിനെതിരെ ഗുരുതര ആരോപണമുണ്ടായിരുന്നത്. പാലക്കാട് എസ്.പി അജിത് കുമാറിന്റെ അന്വേഷണത്തിൽ ഇത് ശരിയാണെന്ന് ബോദ്ധ്യപ്പെട്ടിരുന്നു. ആരോപണം ശരിയാണെന്ന് പീഡിപ്പിക്കപ്പെട്ട യുവതി പാലക്കാട് ജില്ലാ ക്രൈംബ്രാഞ്ച് ഡിവൈ.എസ്.പിക്ക് മൊഴി നൽകിയിരുന്നു.