വാൽപ്പാറയിൽ അഞ്ച് വയസുകാരനെ പുലി കടിച്ചു കൊന്നു; നാട്ടുകാരുടെ നേതൃത്വത്തിൽ പ്രതിഷേധം

കോയമ്പത്തൂർ: തമിഴ്നാട്ടിലെ വാൽപ്പാറയിൽ അഞ്ച് വയസുകാരനെ പുലി കടിച്ചു കൊന്നു. വാൽപ്പാറ എസ്റ്റേറ്റിലെ തോട്ടം തൊഴിലാളിയായ അസം സ്വദേശി രാജ്ബുൾ അലിയുടെ മകൻ സൈഫുൾ ആലം ആണ് കൊല്ലപ്പെട്ടത്. അയ്യർപാടി എസ്റ്റേറ്റ് ബംഗ്ലാവ് ഡിവിഷനിലെ തേയിലത്തോട്ടത്തിൽ നിന്നാണ് കുട്ടിയുടെ മൃതദേഹം കണ്ടെടുത്തത്. വീടിന് മുന്നിൽ കുട്ടി കളിച്ചുകൊണ്ടിരിക്കുമ്പോഴാണ് പുലി പിടിച്ചത്. കുട്ടിയെ പുലി പിടിക്കുന്നത് പരിസരവാസിയായ സ്ത്രീയാണ് കണ്ടത്. ഷാജിത ബീഗം ആണ് മാതാവ്. ദമ്പതികൾക്ക് മൂന്ന് കുട്ടികളാണ് ഉള്ളത്. വാൽപ്പാറയിൽ കഴിഞ്ഞ എട്ട് മാസത്തിനിടെ മൂന്നു കുട്ടികളാണ് പുലിയുടെ ആക്രമണത്തിൽ കൊല്ലപ്പെട്ടത്. സംഭവസ്ഥലത്ത് നാട്ടുകാരുടെ നേതൃത്വത്തിൽ പ്രതിഷേധം തുടരുകയാണ്.