പുതുവർഷത്തിൽ ഈ ശീലങ്ങൾ ഒഴിവാക്കൂ, എങ്കിൽ സമ്പത്തും ഐശ്വര്യവും വർദ്ധിക്കും

ജ്യോതിഷപ്രകാരം ഒരാളുടെ സാമ്പത്തിക സ്ഥിതി ഗ്രഹനിലകൾക്കും ഭാഗ്യത്തിനും ഒപ്പം അവരുടെ നിത്യജീവിതത്തിലെ ശീലങ്ങളെക്കൂടി ആശ്രയിച്ചിരിക്കും. കഠിനാധ്വാനം ചെയ്യുന്നുണ്ടെങ്കിലും സമ്പത്ത് കൈവരുന്നില്ലെങ്കിൽ നമ്മുടെ ചില ദുശ്ശീലങ്ങളാകാം അതിന് തടസമെന്ന് ജ്യോതിഷം പറയുന്നു. സമ്പത്ത് നഷ്ടമാകാനും ദാരിദ്ര്യം ക്ഷണിച്ചുവരുത്തുന്നതിനും കാരണമാകുന്ന ശീലങ്ങൾ താഴെ പറയുന്നവയാണ്.

വൈകി ഉണരുന്നത് (സൂര്യന്റെ ബലഹീനത)

സൂര്യോദയത്തിന് ശേഷം ഏറെ വൈകി ഉണരുന്നത് ജ്യോതിഷ പ്രകാരം അശുഭകരമാണ്. ഇത് നമ്മുടെ ആത്മവിശ്വാസം കുറയ്ക്കാനും കരിയറിൽ തടസങ്ങൾ നേരിടാനും കാരണമാകും. സൂര്യപ്രഭ കുറയുന്നത് പ്രവർത്തനക്ഷമതയെയും ഭാഗ്യത്തെയും ദോഷകരമായി ബാധിക്കും.

പണത്തോടുള്ള അനാദരവ് (ശുക്രനും ലക്ഷ്മീദേവിയും)

നാണയങ്ങൾ വലിച്ചെറിയുക, നോട്ടുകൾ അലക്ഷ്യമായി ചുരുട്ടി വയ്ക്കുക തുടങ്ങിയ ശീലങ്ങൾ ഐശ്വര്യദേവതയെ അസന്തുഷ്ടയാക്കും. ഭക്ഷണവും ജലവും പാഴാക്കുന്നതും സാമ്പത്തിക ബുദ്ധിമുട്ടുകൾക്കും കടബാധ്യതയ്ക്കും വഴിവയ്ക്കും. സമ്പത്തിന്റെ ഗ്രഹമായ ശുക്രന്റെ അപ്രീതിക്കും കാരണമാകും.

തകരാറിലായ ഉപകരണങ്ങൾ സൂക്ഷിക്കുന്നത്

പ്രവർത്തിക്കാത്ത ഇലക്ട്രോണിക് ഉപകരണങ്ങൾ, പൊട്ടിയ കണ്ണാടികൾ, നിലച്ചുപോയ ക്ലോക്കുകൾ എന്നിവ വീട്ടിൽ സൂക്ഷിക്കുന്നത് നെഗറ്റീവ് ഊർജ്ജം നിറയ്ക്കും. ഇത് വരുമാനം തടസപ്പെടാനും തീരുമാനങ്ങൾ വൈകാനും ഇടയാക്കും. വാസ്തു ശാസ്ത്ര പ്രകാരം വീടിന്റെ പ്രധാന കവാടം വഴിയാണ് ഐശ്വര്യം അകത്തേക്ക് പ്രവേശിക്കുന്നത്. മുൻവാതിലിന് സമീപം പഴയ ചെരുപ്പുകൾ കൂട്ടിയിടുകയോ മാലിന്യങ്ങൾ നിക്ഷേപിക്കുകയോ ചെയ്യുന്നത് ധനാഗമനത്തെ തടസപ്പെടുത്തും.

സഹായമനോഭാവമില്ലാത്തത് (വ്യാഴത്തിന്റെ അപ്രീതി)
സമ്പത്തിന്റെയും അറിവിന്റെയും ഗ്രഹമായ വ്യാഴം (ഗുരു) പ്രീതനാകാൻ ദാനധർമ്മങ്ങൾ അത്യാവശ്യമാണ്. സ്വാർത്ഥതയും മറ്റുള്ളവരെ സഹായിക്കാനുള്ള വിമുഖതയും സാമ്പത്തിക വരൾച്ചയ്ക്കും അപ്രതീക്ഷിത നഷ്ടങ്ങൾക്കും ഇടയാക്കും.

അലസത (ശനിദോഷം)
കർമ്മഫലങ്ങളുടെ അധിപനായ ശനിദേവൻ കഠിനാധ്വാനികളെയാണ് അനുഗ്രഹിക്കുന്നത്. അലസതയുള്ളവരും കാര്യങ്ങൾ മാറ്റിവയ്ക്കുന്നവരും ശനിയുടെ അപ്രീതിക്ക് പാത്രമാകും. ഇത് തൊഴിൽ പുരോഗതിയെ തടയുകയും ദാരിദ്ര്യം ക്ഷണിച്ചു വരുത്തുകയും ചെയ്യുന്നു.

ജീവിതത്തിൽ കൃത്യനിഷ്ഠ പാലിച്ച് ശുചിത്വത്തിന് പ്രാധാന്യം നൽകുകയും, വരുമാനത്തിന്റെ വിഹിതം പാവപ്പെട്ടവർക്കായി നീക്കിവയ്ക്കുകയും ചെയ്യുന്നതിലൂടെ ഗ്രഹദോഷങ്ങൾ അകറ്റാനും സാമ്പത്തിക അഭിവൃദ്ധി നേടാനും സാധിക്കും.