ഗുണവും രുചിയും ഇരട്ടി; ഉപ്പുമാവ് ഇനി ഇങ്ങനെ ഉണ്ടാക്കി നോക്കൂ, അഡിക്റ്റ് ആകും

മലയാളികൾക്ക് പൊതുവെ ഇഷ്ടമുള്ള പ്രഭാതഭക്ഷണമാണ് ഉപ്പുമാവ്. ആഴ്ചയിൽ ഒരു തവണയെങ്കിലും ഉപ്പുമാവ് വീടുകളിൽ ഉണ്ടാക്കാറുണ്ട്. എന്നാൽ സ്ഥിരം ശെെലിയിൽ നിന്ന് മാറി ഒരു വെറ്റെറ്റി ഉപ്പുമാവ് ട്രെെ ചെയ്താലോ?​ പറഞ്ഞുവരുന്നത് ബീറ്റ്റൂട്ട് ഉപ്പുമാവിനെക്കുറിച്ചാണ്. മുതിർന്നവർക്കും കുട്ടികൾക്കും ഒരുപോലെ ഇഷ്ടപ്പെടുന്ന ഈ ഉപ്പുമാവ് ഉണ്ടാക്കാനും വളരെ എളുപ്പമാണ്.

ആവശ്യമായ സാധനങ്ങൾ

1. റവ – ഒരു കപ്പ്
2. ബീറ്റ്റൂട്ട് – ഒരെണ്ണം (ഗ്രേറ്റ് ചെയ്തത്)​
3. സവാള – ഒരെണ്ണം ചെറുതായി അരിഞ്ഞത്
4. തക്കാളി – ഒന്നിന്റെ പകുതി
5. പച്ചമുളക് – രണ്ടെണ്ണം
6. വറ്റൽമുളക് – ഒന്ന്
7. കറിവേപ്പില – ആവശ്യത്തിന്
8. ഉപ്പ് – ആവശ്യത്തിന്
9. വെളിച്ചെണ്ണ – ആവശ്യത്തിന്
10. കടുക് - ആവശ്യത്തിന്

തയ്യാറാക്കുന്ന വിധം

ആദ്യം ഒരു കടായി അടുപ്പിൽ വച്ച് വെളിച്ചെണ്ണ ഒഴിച്ച് കടുക് പൊട്ടിക്കുക. അതിലേക്ക് വറ്റൽ മുളക്,​ കറിവേപ്പില എന്നിവയിട്ട് മൂപ്പിക്കണം. ശേഷം സവാള,​ തക്കാളി,​ പച്ചമുളക്,​ ബീറ്റ്റൂട്ട് എന്നിവ ഇട്ട് കുറച്ചുനേരം ഇളക്കി അടച്ചുവച്ച് വേവിക്കുക. ഇനി റവ അതിലേക്ക് ഇട്ട് കുറച്ച് നേരം വറുക്കണം. ശേഷം അതിലേക്ക് തിളച്ച വെള്ളം ആവശ്യത്തിന് ഒഴിച്ച് കൊടുക്കുക. പാകത്തിന് ഉപ്പും ഈ സമയത്ത് ചേർക്കാം. ഇനി നന്നായി യോജിപ്പിച്ച് അടച്ചുവച്ച് വേവിക്കുക. ഇതാ നല്ല കിടിലൻ ബീറ്റ്റൂട്ട് ഉപ്പുമാവ് റെഡി. ഇതിനൊപ്പം പയറോ പപ്പടമോ പഞ്ചസാരയോ ചേർത്ത് കഴിക്കാം. ആരോഗ്യത്തിനും ഇത് വളരെ നല്ലതാണ്.