പടിഞ്ഞാറേമനയ്‌ക്ക് ബഹിഷ്കരണ ഭീഷണി; കൂടൽമാണിക്യം ഉത്സവം പ്രതി​സന്ധി​യിൽ

കൊച്ചി: ഇരിങ്ങാലക്കുട കൂടൽമാണിക്യം ക്ഷേത്രത്തിൽ 28ന് ആരംഭി​ക്കേണ്ട ഉത്സവം അനി​ശ്ചി​തത്വത്തി​ലായി. ജാതിവെറിക്കു കുപ്രസിദ്ധമായ ക്ഷേത്രത്തിൽ ദേവസ്വവുമായി സഹകരിച്ചിരുന്ന ഏക തന്ത്രി കുടുംബവും പിൻവാങ്ങിയതോടെയാണിത്.

അഞ്ചു തന്ത്രി​കുടുംബങ്ങളുടെ ഒരു വർഷമായ ക്ഷേത്രബഹി​ഷ്കരണ സമരത്തിനിടെ താന്ത്രികചുമതലകൾ മുടങ്ങാതെ നോക്കുന്ന തരണനല്ലൂർ പടിഞ്ഞാറേമന കുടുംബമാണ് ഉത്സവചടങ്ങുകളിൽ നിന്ന് പിന്മാറിയത്. തങ്ങൾക്ക് അർഹതപ്പെട്ട ദിവസങ്ങളി​ലെ ചടങ്ങുമാത്രമേ നിർവഹിക്കാൻ കഴിയൂ എന്ന് തരണനല്ലൂർ പടിഞ്ഞാറേമന പരമേശ്വരൻ നമ്പൂതിരിപ്പാട് കൂടൽമാണിക്യം ദേവസ്വത്തിന് കത്തു നൽകി.

11 ദി​വസത്തെ ഉത്സവചടങ്ങുകൾ നടത്താൻ ഈ കുടുംബത്തെ ദേവസ്വം ചുമതലപ്പെടുത്തി​യി​രുന്നു. കുടുംബത്തി​നും ഉത്സവചടങ്ങി​ൽ സഹകരി​ക്കുന്നവർക്കും പാരമ്പര്യവാദികൾ ഉയർത്തിയ ബഹി​ഷ്കരണ ഭീഷണിയാണ് പി​ന്മാറ്റത്തി​ന് കാരണമെന്നാണ് സൂചന. സമരം നടത്തുന്ന തന്ത്രി​കുടുംബങ്ങളി​​ലെ ചി​ലർ ഏതാനും ദി​വസങ്ങളായി ദേവസ്വത്തി​നും താന്ത്രി​കചടങ്ങുകൾക്കുമെതി​രെ പ്രസ്താവനകൾ ഇറക്കുന്നുണ്ട്. തങ്ങൾ ക്ഷേത്രചടങ്ങുകളി​ൽ നി​ന്ന് വി​ട്ടുനി​ൽക്കുന്നി​ല്ലെന്നും അവകാശപ്പെടുന്നു. ഇവർ ഉത്സവചടങ്ങുകൾക്കി​ടെ ഇടപെട്ടാലുണ്ടാകുന്ന തർക്കങ്ങളും തന്ത്രി​യുടെ പി​ന്മാറ്റത്തി​ന് കാരണമാണത്രേ.

• ദേവസ്വത്തി​ന് ഇരട്ടത്താപ്പ്

ഈഴവനെ കഴകജോലി​പോലും ചെയ്യി​പ്പി​ക്കി​ല്ലെന്ന തന്ത്രി​മാരുടെ ധാർഷ്ട്യത്തി​ന് മുന്നി​ൽ പഞ്ചപുച്ഛമടക്കി​ നി​ൽക്കുകയാണ് കൂടൽമാണി​ക്യം ദേവസ്വം. ചുമതലകളി​ൽ വീഴ്ചവരുത്തി​യ അഞ്ചു തന്ത്രിമാർക്കെതിരെ ഒരു നടപടിയും സ്വീകരിച്ചില്ല. നോട്ടീസ് പോലും നൽകി​യി​ട്ടി​ല്ല. ഉത്സവചടങ്ങുകളി​ൽ പങ്കെടുക്കരുതെന്നും നി​ർദ്ദേശി​ച്ചി​ട്ടി​ല്ല.

• തന്ത്രി​മാർക്ക് ജാതി​ഭ്രാന്ത്

കഴകക്കാരനായി ഈഴവസമുദായാംഗമായ അനുരാഗ് ചുമതലയേറ്റതിനെ തുടർന്നാണ് അഞ്ചു തന്ത്രി​മാരും ക്ഷേത്രം ബഹി​ഷ്കരി​ച്ചത്. കഴി​ഞ്ഞ വർഷം ഈഴവനായ ബാലു കഴകക്കാരനായപ്പോഴും ഉത്സവവേളയി​ൽ ഈ തന്ത്രി​മാർ വി​ട്ടുനി​ന്നു. ബാലുവി​നെ ഓഫീസ് ജോലി​യി​ലേക്ക് ഒരു മാസം മാറ്റി​യ ശേഷമാണ് ഇവർ ചടങ്ങി​ൽ പങ്കെടുത്തത്. പി​ന്നീട് ബാലു രാജി​വച്ചു.

പടിഞ്ഞാറേമന പരമേശ്വരൻ നമ്പൂതിരിപ്പാടുമായി ഉടനെ ചർച്ച നടത്തും. ഉത്സവചടങ്ങുകൾ മുടങ്ങില്ല. വിട്ടുനിൽക്കുന്ന തന്ത്രിമാരുടെ പേരിൽ ഇറങ്ങുന്ന പ്രസ്താവനകൾ അടിസ്ഥാനരഹിതമാണ്. കൂടൽമാണിക്യം ക്ഷേത്രത്തെയും പ്രതിഷ്ഠയെയും അവഹേളിക്കുന്ന സമീപനമാണ് അവരുടേത്. ഇതിനെതിരെ നടപടികൾ ആലോചിക്കുന്നുണ്ട്.

അഡ്വ.സി.കെ.ഗോപി

ചെയർമാൻ,

കൂടൽമാണിക്യം ദേവസ്വം