40ാം വയസിൽ അമ്മയാകുന്ന ദീപിക പദുക്കോൺ; സ്‌ത്രീകൾ ചെറുപ്രായത്തിൽതന്നെ പ്രസവിക്കേണ്ടതുണ്ടോ?

40ാം വയസിൽ രണ്ടാമത്തെ കുഞ്ഞിന് ജന്മം നൽകാനൊരുങ്ങുകയാണ് ബോളിവുഡ് സൂപ്പർതാരം ദീപിക പദുക്കോൺ. സ്‌ത്രീകൾ 30 വയസിനുള്ളിൽ അമ്മയാകണമെന്ന പൊതുഅഭിപ്രായവും ആരോഗ്യവിദഗ്ദ്ധരുടെ നിർദേശങ്ങളും നിലനിൽക്കെയാണ് ദീപികയുടെ ഗ‌ർഭവാർത്തയെത്തുന്നത്. 35 വയസിനോ അതിന് മുകളിലോ സ്ത്രീകൾ കുഞ്ഞുങ്ങൾക്ക് ജന്മം നൽകുന്നതിനെ അ‌ഡ്വാൻസ്‌ഡ് ഏജ് പ്രഗ്നൻസി (എഎംഎ) എന്നാണ് വിളിക്കുന്നത്. ഇതിന് വലിയ വെല്ലുവിളികളും സ്ത്രീകൾ നേരിടേണ്ടതായി വരുന്നു.

ഉയർന്ന രക്തസമ്മർദ്ദവും പ്രീക്ലാമ്പ്സിയയും
ഗർഭാവസ്ഥയിൽ ഉണ്ടാകുന്ന പ്രധാന ആശങ്കകളിലൊന്ന് ഉയർന്ന രക്തസമ്മർദ്ദ പ്രശ്‌നങ്ങൾ ഉണ്ടാകാനുള്ള സാദ്ധ്യതയാണ്. സ്ത്രീകൾ പ്രായമാകുമ്പോൾ രക്തക്കുഴലുകൾക്ക് വഴക്കം കുറയുകയും സമ്മർദ്ദ മാറ്റങ്ങൾക്ക് കൂടുതൽ സെൻസിറ്റീവ് ആകുകയും ചെയ്യുന്നു. ഇത് ഗർഭധാരണം മൂലമുണ്ടാകുന്ന ഉയർന്ന രക്തസമ്മർദ്ദം, അതിന്റെ കൂടുതൽ കഠിനമായ രൂപമായ പ്രീക്ലാമ്പ്സിയ തുടങ്ങിയ അവസ്ഥകളിലേയ്ക്ക് നയിക്കുന്നു.

പ്രീക്ലാമ്പ്സിയയിൽ ഉയർന്ന രക്തസമ്മർദ്ദവും അവയവങ്ങളുടെ തകരാറിന്റെ ലക്ഷണങ്ങളും കാണപ്പെടുന്നു. ഇത് പലപ്പോഴും വൃക്കകളെയോ കരളിനെയോ ബാധിക്കുന്നു. പ്രീക്ലാമ്പ്സിയയ്ക്ക് കൃത്യമായ ചികിത്സ നൽകിയില്ലെങ്കിൽ അപസ്മാരം, പക്ഷാഘാതം അല്ലെങ്കിൽ മാസം തികയാതെയുള്ള പ്രസവം പോലുള്ള ഗുരുതരമായ സങ്കീർണതകൾക്ക് കാരണമാകും.

ഗർഭകാല പ്രമേഹം
മറ്റൊരു പ്രശ്നം ഗർഭകാല പ്രമേഹമാണ്. ഗർഭകാലത്ത് ശരീരത്തിന് രക്തത്തിലെ പഞ്ചസാര കൃത്യമായി കൈകാര്യം ചെയ്യാൻ കഴിയില്ല. പ്രായമായ സ്ത്രീകൾക്ക് ഇതിന്റെ അപകടസാദ്ധ്യത കൂടുതലാണ്. പ്രായമായ സ്ത്രീകളിൽ പ്രായത്തിനനുസരിച്ച് മെറ്റബോളിസവും ഇൻസുലിൻ സംവേദനക്ഷമതയും മാറുന്നു. ഇത് ഗർഭാവസ്ഥ നേരിടാൻ ശരീരത്തിന് ബുദ്ധിമുട്ടുണ്ടാക്കുന്നു.

ഗർഭാവസ്ഥയിൽ ഉയർന്ന പ്രമേഹം അണുബാധ, പ്രസവത്തിലെ ബുദ്ധിമുട്ടുകൾ എന്നിവയ്ക്കുള്ള സാദ്ധ്യത വർദ്ധിപ്പിക്കും. ഇത് ശരാശരിയേക്കാൾ കുഞ്ഞിന് വലിപ്പമുണ്ടാകാനും കാരണമായേക്കാം. ഇക്കാരണത്താൽ പ്രസവസമയത്ത് പരിക്കുകൾ ഉണ്ടാകാനുള്ള സാദ്ധ്യത വർദ്ധിപ്പിക്കുകയും ചെയ്യും. ഗർഭകാല പ്രമേഹം ബാധിച്ച സ്ത്രീകൾക്ക് പിന്നീടുള്ള ജീവിതത്തിൽ ടൈപ്പ് 2 പ്രമേഹം വരാനുള്ള സാദ്ധ്യതയും കൂടുതലാണ്.

ഗർഭം അലസലും ചാപിള്ള ജനനവും
ഗർഭം അലസപ്പെടാനുള്ള സാദ്ധ്യതയാണ് മറ്റൊരു വെല്ലുവിളി. സ്ത്രീകൾ പ്രായമാകുമ്പോൾ അണ്ഡങ്ങളുടെ ഗുണനിലവാരം കുറയുകയും ക്രോമസോം അസാധാരണത്വങ്ങൾ ഉണ്ടാകാനുള്ള സാദ്ധ്യത വർദ്ധിക്കുകയും ചെയ്യുന്നു. ഇത് ഗർഭം അലസാനുള്ള സാദ്ധ്യത വർദ്ധിപ്പിക്കും, പ്രത്യേകിച്ച് ആദ്യ ത്രിമാസത്തിൽ. പഠനങ്ങൾ കാണിക്കുന്നത് പ്രായം കുറഞ്ഞ സ്ത്രീകൾക്ക് ഗർഭം അലസാനുള്ള സാദ്ധ്യത കുറവാണെന്നും 35 വയസിനുശേഷം ഈ സാദ്ധ്യത ഗണ്യമായി വർദ്ധിക്കുകയും 40 വയസിനു മുകളിൽ കൂടുതലാവുകയും ചെയ്യുന്നു.

പ്രസവസമയത്തെ സങ്കീർണതകൾ
പ്രായമായ സ്ത്രീകൾക്ക് പ്രസവസമയത്ത് കൂടുതൽ വെല്ലുവിളികൾ നേരിടേണ്ടി വന്നേക്കാം. ഗർഭാശയവും സെർവിക്സും സ്വാഭാവിക പ്രസവ പ്രക്രിയയോട് അത്ര എളുപ്പത്തിൽ പ്രതികരിച്ചേക്കില്ല. ഇത് പ്രസവസമയം ദീർഘിപ്പിക്കുന്നതിനോ ദുർബലമായ സങ്കോചങ്ങൾക്കോ, മെഡിക്കൽ ഇൻഡക്ഷന്റെ ആവശ്യകതയ്‌ക്കോ കാരണമാകും. അസാധാരണമായ ഗർഭപിണ്ഡത്തിന്റെ സ്ഥാനം, പ്രസവത്തിലെ മന്ദഗതിയിലുള്ള പുരോഗതി, ഉയർന്ന രക്തസമ്മർദ്ദം, പ്രമേഹം പോലുള്ള മറ്റ് മെഡിക്കൽ അവസ്ഥകൾ എന്നിവ കാരണം സിസേറിയൻ ആവശ്യമായി വരാനുള്ള സാദ്ധ്യതയും കൂടുതലാണ്.

മാസം തികയാതെയുള്ള പ്രസവവും പ്രസവാനന്തര പ്രശ്നങ്ങളും
മാസം തികയാതെയുള്ള പ്രസവമാണ് മറ്റൊരു വെല്ലുവിളി. ഗർഭധാരണത്തിന് 37 ആഴ്ചകൾക്ക് മുമ്പ് കുഞ്ഞ് ജനിക്കുന്നതാണ് മാസം തികയാതെയുള്ള പ്രസവം. മാസം തികയാതെ ജനിക്കുന്ന കുഞ്ഞുങ്ങൾക്ക് കൂടുതൽ പരിചരണം ആവശ്യമാണ്. ഇത് അമ്മയ്ക്ക് സമ്മർദ്ദവും ഉത്കണ്ഠയും വർദ്ധിപ്പിക്കാനുമിടയാക്കും. മാസം തികയാതെ ജനിച്ച കുഞ്ഞിനെ പരിപാലിക്കുന്നതിലെ ശാരീരിക സമ്മർദ്ദവും വൈകാരിക ഉത്കണ്ഠയും പ്രസവാനന്തര കാലഘട്ടത്തെ കൂടുതൽ ദുഷ്കരമാക്കും. പ്രസവശേഷം കനത്ത രക്തസ്രാവം, മുറിവ് ഉണങ്ങുന്നത് മന്ദഗതിയിലാക്കുക, കടുത്ത ക്ഷീണം തുടങ്ങിയ പ്രസവാനന്തര സങ്കീർണതകൾ പ്രായമായ സ്ത്രീകൾക്ക് അനുഭവപ്പെടാം. പ്രസവശേഷം ഹോർമോൺ മാറ്റങ്ങൾ, ഉറക്കക്കുറവ്, നവജാത ശിശു പരിചരണത്തിന്റെ ആവശ്യകത എന്നിവ ഈ ലക്ഷണങ്ങളെ കൂടുതൽ വഷളാക്കും.