കൂലിപ്പണിക്കാരൻ വിളിയിൽ ആത്മാഭിമാനം: മന്ത്രി രാജൻ 

തിരുവനന്തപുരം: കൂലിപ്പണിരാജൻ എന്ന വിളിയിൽ ആത്മാഭിമാനം മാത്രമാണുള്ളതെന്ന് റവന്യൂമന്ത്രി കെ.രാജൻ. മുതലാളിരാജൻ എന്ന പേരു കേട്ടില്ലല്ലോയെന്നും എം.എൻ.സ്മാരകത്തിലെ വാർത്താസമ്മേളനത്തിൽ അദ്ദേഹം പറഞ്ഞു.

കൂലിപ്പണിക്കാരൻ രാജൻ, തൃശൂരിൽ നിന്ന് വാർക്കപ്പണിക്ക് ഒരു പണിക്കാരനെ കിട്ടി,​ എന്നൊക്കെയാണ് കേൾക്കുന്നത്. പി.സി.ജോഷിയുടേയും രാജേഷ് റാവുവിന്റേയും പി.കൃഷ്ണപിള്ളയുടേയും സ്മരണകൾ ഉറങ്ങുന്ന ഈ പാർട്ടി ഓഫീസിൽ നിന്നാണ് തന്നെ മന്ത്രിയായി ചുമതലപ്പെടുത്തിയത്. അഞ്ചുവർഷങ്ങൾക്കു ശേഷം തിരിച്ചുവരുമ്പോൾ മുതലാളിരാജൻ എന്ന പേരു കേട്ടില്ലല്ലോ. താൻ പ്രതിനിധീകരിക്കുന്നത് ഒരു തൊഴിലാളി വർഗ പ്രസ്ഥാനത്തെയാണ്. കൂലിപ്പണിക്കാരന്റെയും മത്സ്യത്തൊഴിലാളികളുടേയും വേദനകൾ അറിയുന്ന മണ്ണിൽ നിന്നുവന്ന ആളെന്ന നിലയിൽ അഭിമാനകരമായ സമ്മാനമായി ആ വിളി ഹൃദയപൂർവം ഏറ്റുവാങ്ങുന്നു. ഈ പറയുന്നവർക്ക് കൂലിപ്പണിക്കാരെക്കുറിച്ചുള്ള സങ്കല്പം എന്തായിരിക്കുമെന്നും അദ്ദേഹം ചോദിച്ചു.

വയനാട് ടൗൺഷിപ്പിലെ വീടുകളിൽ വാട്ടർ പോണ്ടിംഗ് ടെസ്റ്റ് നടത്താൻ നേരത്തെ തീരുമാനിച്ചതാണ്. വീടുകളുടെ ടെറസിൽ 24 മണിക്കൂർ വെള്ളം കെട്ടിനിറുത്തും. ലീക്കുണ്ടെങ്കിൽ അപ്പോക്സി ട്രീറ്റ്‌മെന്റ് നടത്തും. വീണ്ടും 24 മണിക്കൂർ വെള്ളം കെട്ടിനിറുത്തി,​ ലീക്കില്ലെന്ന് ഉറപ്പാക്കിയ ശേഷമാകും വാട്ടർ പ്രൂഫിംഗ് നടത്തുക. പിന്നീട് 2 മുതൽ 7 സെന്റിമീറ്റർ കനത്തിൽ സ്‌ക്രീഡ് കോൺക്രീറ്റ് ചെയ്യും. വാട്ടർ പോണ്ടിംഗ് നടത്തിയപ്പോൾ രണ്ടു വീടുകളിൽ വെള്ളം കിനിയുന്നതായി കണ്ടു. എൻജിനിയർമാരാണ് ആ സ്ഥലം മാർക്കുചെയ്തത്. ഇതാണ് വിള്ളലാണെന്ന് പ്രചരിച്ചത്. താപനിലയിലെ വ്യത്യാസം മൂലമുണ്ടായ ഷ്രിങ്കേജ് മാത്രമാണതെന്ന് സർക്കാർ ഏജൻസിയായ കിഫ്‌കോണിലെ എൻജിനിയർമാർ അറിയിച്ചെന്നും മന്ത്രി രാജൻ പറഞ്ഞു.