ഗൈനക് സർജൻമാരുടെ സംസ്ഥാന സമ്മേളനം കൊല്ലത്ത്

കൊല്ലം: വജൈനൽ സർജറി ചെയ്യുന്ന ഗൈനക്കോളജി ചികിത്സാ വിദഗ്ദ്ധരുടെ സംഘടനയായ സൊസൈറ്റി ഒഫ് വജൈനൽ സർജൻസ് ഓഫ് ഇന്ത്യ (സോവ്‌​സി) ഒന്നാം സംസ്ഥാന സമ്മേളനം 16, 17 തിയതികളിൽ കൊല്ലത്ത് നടക്കും. സോവ്‌​സി കൊല്ലം ചാപ്റ്ററാണ് സമ്മേളനം സംഘടിപ്പിക്കുന്നത്. ക്വയ്‌​ലോൺ ബീച്ച് ഹോട്ടലിൽ നടക്കുന്ന സമ്മേളനത്തിൽ 500 ഡോക്ടർമാർ പങ്കെടുക്കുമെന്ന് സോവ്‌​സി സംസ്ഥാന പ്രസിഡന്റ് ഡോ. എൻ.ആർ. റീന, സംസ്ഥാന സെക്രട്ടറി ഡോ. എം. ദീപ്തി, ജനറൽ കൺവീനർ ഡോ. എം. വേണുഗോപാൽ എന്നിവർ അറിയിച്ചു. സംസ്ഥാനത്തെ വിവിധ മെഡിക്കൽ കോളജുകളിൽ നിന്ന്150 പിജി വിദ്യാർത്ഥികളും സമ്മേളനത്തിനെത്തും.

ഗൈനക്കോളജിയുമായി ബന്ധപ്പെട്ട നൂതന ചികിത്‌​സകൾ പരിചയപ്പെടുത്താൻ 16ന് രാവിലെ 9 മുതൽ വൈകിട്ട് 4 വരെ ശില്പശാല സംഘടിപ്പിക്കും. വൈകിട്ട് 6.30ന് സമ്മേളനം സോവ്‌​സി ദേശീയ പ്രസിഡന്റ് ഡോ. വി.പി. പൈലിയും പ്രശസ്ത ഗൈനക് സർജൻ ഡോ. പി.സി. മഹാപത്രയും ചേർന്ന് ഉദ്ഘാടനം ചെയ്യും. ഡോ. എൻ.ആർ. റീന അദ്ധ്യക്ഷത വഹിക്കും. 17ന് രാവിലെ 9 മുതൽ വൈകിട്ട് 3.40 വരെ വിദഗ്ദ്ധർ നൂറോളം പ്രബന്ധങ്ങൾ അവതരിപ്പിക്കും. ഗൈനക്കോളജിയുമായി ബന്ധപ്പെട്ട വിവിധ വിഷയങ്ങളിൽ ചർച്ചകളും നടക്കും. മുതിർന്ന ഗൈനക് സർജൻമാരായ ഡോ. എച്ച്.പി. പട്‌​നായിക്, ഡോ. പി.സി. മഹാപത്ര, ഡോ. അപൂർവ്വ ബി.പഞ്ചോളി, ഡോ. ശ്രീകല പ്രസാദ്, ഡോ. ലില്ലി വർഗീസ് എന്നിവർ ചർച്ചകൾ നയിക്കും. പി.ജി വിദ്യാർത്ഥികൾ ഗൈനക്കോളജിയുമായി ബന്ധപ്പെട്ട പ്രബന്ധങ്ങളും വീഡിയോകളും പോസ്റ്ററുകളും അവതരിപ്പിക്കും. 17ന് വൈകിട്ട് 3.50ന് സമാപന സമ്മേളനം.