അശ്ലീല ചിത്രം അയച്ചയാൾക്ക് സാധിക നൽകിയത് മുട്ടൻ മറുപടി 'ഇത്തരം ജന്മങ്ങൾ ആണിന് ശാപം'

കണ്ണൂർ: ഫേസ്ബുക്കിലൂടെ അശ്ലീല സന്ദേശം അയച്ചയാൾക്കെതിരെ രൂക്ഷ പ്രതികരണവുമായി നടി സാധിക വേണുഗോപാൽ. നഗ്നചിത്രം അയച്ച വിനീത് എന്ന യുവാവിനെയാണ് താരം തുറന്നുകാട്ടിയത്. മെസേജിന്റെ സ്‌ക്രീൻഷോട്ടും സാധിക പങ്കുവച്ചിട്ടുണ്ട്. കോഴിക്കോട് സ്വദേശിയും സീരിയൽ, ചലച്ചിത്ര നടിയുമായ സാധികയുടെ ഫേസ് ബുക്ക് പോസ്റ്റ് വൈറലായി.

സാധികയുടെ കുറിപ്പ് ഇങ്ങനെ :

ഇതുപോലുള്ള ജന്മങ്ങൾ ആണ് ആണിന്റെ ശാപം…. നട്ടെല്ലിന്റെ സ്ഥാനത്തു റബർ വച്ചു പിടിപ്പിച്ച, ജനിപ്പിച്ച അമ്മമാർക്ക് പോലും മനസ്സമാധാനം കൊടുക്കാത്ത ജന്മങ്ങൾ….

പെണ്ണ് എന്ന വാക്കിന് കാമം എന്ന് മാത്രം അർത്ഥം അറിയാവുന്ന പാഴ്ജന്മങ്ങൾ… ഇതുപോലത്തെ ജന്മങ്ങൾ കാരണം ആണ് പലരും ഇൻബോക്സ് തുറക്കാത്തതും മെസേജിന് റിപ്ലൈ തരാത്തതും… ഒരുപാട് ഒന്നും വേണ്ട ഇതുപോലത്തെ കുറച്ചുപേർ മതി ആണിന്റെ വില കളയാൻ.

പെണ്ണിന്റെ കാല് കണ്ടാൽ കുഴപ്പം, പൊക്കിൾ കണ്ടാൽ കുഴപ്പം, വയറു കണ്ടാൽ കുഴപ്പം, സത്യത്തിൽ ഇതൊക്കെ ആരുടെ കുഴപ്പം ആണ്? ഇതൊന്നും കണ്ടാലും ഒരു കുഴപ്പവും ഇല്ലാത്ത നട്ടെല്ലുള്ള നല്ല അസൽ ആൺകുട്ടികൾ ഉണ്ട് ഈ നാട്ടിൽ…

അപ്പൊ ഇതൊന്നും ആണിന്റെയോ പെണ്ണിന്റെയോ കുഴപ്പം അല്ല. വികാരം മനുഷ്യസഹജം ആണ്, വികാരത്തെ നിയന്ത്രിക്കാൻ കഴിവില്ലാത്തതു ആ വ്യക്തിയുടെ പ്രശ്നം ആണ്.

ഞാൻ എന്താവണം എന്നത് ഞാൻ തീരുമാനിക്കണം. ഞാൻ എന്ന വ്യക്തി എന്റെ വീട്ടിനു പുറത്തുള്ള സ്ത്രീകളെ/പുരുഷന്മാരെ എങ്ങനെ കാണണം എന്നത് എന്റെ തീരുമാനം ആണ്.

അല്ലാതെ സാഹചര്യമോ വളർത്തു ദോഷമോ ലിംഗദോഷമോ അല്ല. അത് ആർക്കും വന്നു പഠിപ്പിച്ചു തരാൻ ഒക്കില്ല. പരസ്പര ബഹുമാനം എന്നൊന്ന് ഉണ്ട് അത് മനുഷ്യൻ ആയാലും മൃഗം ആയാലും സസ്യം ആയാലും അത് പ്രകൃതി നിയമം ആണ്.

അത് മനസിലാവാനുള്ള മാനസിക വളർച്ച ഇല്ലെങ്കിൽ പെണ്ണിനെ കണ്ടാൽ ഉണ്ടാകുന്ന ആ വികാരം ഇനിയൊരു പെൺകുഞ്ഞിന് ജന്മം നല്കാതിരിക്കട്ടെ എന്ന് ഞാൻ പ്രാർത്ഥിക്കാം.

ഞാൻ ഇടുന്ന ഫോട്ടോയും എന്റെ വസ്ത്രധാരണ രീതിയുമാണ് പ്രശ്നം എന്ന് പറയാൻ വരുന്നവരോട് ഒന്നേ പറയാനുള്ളൂ.

എന്റെ വ്യക്തി സ്വാതന്ത്ര്യം എന്നെ പീഡിപ്പിക്കാനുള്ള നിങ്ങളുടെ അവകാശം അല്ല. നിങ്ങളുടെ മനോരോഗം എന്റെ അവകാശങ്ങളുടെ മേൽ അടിച്ചേല്പിക്കരുത്.