കഥ ചോദിച്ച് വിളിച്ച ദിലീപിന് ഇന്നച്ചൻ നൽകിയ മറുപടി! അപ്പോൾ മാർച്ച് 11ന് കാണാമെന്ന് ദിലീപ്; സുനാമിയുടെ ടീസർ പുറത്തുവിട്ടു

ലാലും ലാൽ ജൂനിയറും ചേർന്ന് സംവിധാനം നിർവഹിക്കുന്ന 'സുനാമി'യുടെ രസകരമായ ടീസർ പുറത്തുവിട്ടു.മാർച്ച് 11നാണ് സിനിമ തീയേറ്ററുകളിലെത്തുന്നത്.സിനിമയുടെ കഥ ചോദിച്ച് ഇന്നസെന്റിനെ ദിലീപ് ഫോണിൽ വിളിക്കുന്നതും, ഇരുവരും തമ്മിലുള്ള സംഭാഷണവുമാണ് ടീസറിലുള്ളത്.'

ലാൽ തന്നെയാണ് കഥയും തിരക്കഥയും ഒരുക്കിയിരിക്കുന്നത്. സുനാമി' ഒരു പക്കാ ഫാമിലി എന്റർടൈനറാണ്.പാണ്ട ഡാഡ് പ്രൊഡക്ഷൻസിന്റെ ബാനറിൽ അലൻ ആന്റണിയാണ് സിനിമ നിർമിച്ചിരിക്കുന്നത്. ഇന്നസെന്റ്, മുകേഷ്, അജു വർഗീസ്, ബാലു വർഗീസ്, സുരേഷ് കൃഷ്ണ, ബിനു അടിമാലി, ആരാധ്യ ആൻ, അരുൺ ചെറുകാവിൽ, ദേവി അജിത്, നിഷ മാത്യു, വത്സല മേനോൻ, സിനോജ് വർഗീസ്, സ്മിനു എന്നിങ്ങനെ വലിയൊരു താരനിര തന്നെ ചിത്രത്തിൽ അണിനിരക്കുന്നുണ്ട്. തൃശൂർ, യു സി കോളേജ് എന്നിവിടങ്ങളിലായിട്ടാണ് സുനാമി ചിത്രീകരണം പൂർത്തിയാക്കിയത്.

അലക്‌സ് ജെ പുളിക്കൽ ഛായാഗ്രഹണവും രതീഷ് രാജ് എഡിറ്റിംഗും നിർവഹിക്കുന്ന സിനിമയുടെ സംഗീതം കൈകാര്യം ചെയ്യുന്നത് യക്‌സൻ ഗാരി പെരേരയും നേഹ എസ് നായരും ചേർന്നാണ്. പ്രവീൺ വർമയാണ് കോസ്റ്റ്യൂം ഡിസൈനർ. 23 മ്യൂസിക്‌സിന്റെ യൂട്യൂബ് ചാനലിലൂടെയാണ് ടീസർ പുറത്തുവിട്ടിരിക്കുന്നത്.