അടുത്തിടെയാണ് ബെൽസ് പാഴ്സി രോഗം ബാധിച്ച വിവരം നടനും അവതാരകനുമായ മിഥുൻ രമേശ് ആരാധകരെ അറിയിച്ചത്. രോഗമുക്തി നേടി തിരികെ ജോലിയിൽ പ്രവേശിച്ചിരിക്കുകയാണ് അദ്ദേഹമിപ്പോൾ. ദുബായിൽ ഹിറ്റ് 96.7ൽ ആർ ജെ കൂടിയാണ് മിഥുൻ.

തന്റെ അസുഖ വിവരമറിഞ്ഞ് പലരും തനിക്ക് വേണ്ടി അർച്ചന കഴിപ്പിക്കുകയും പള്ളിയിൽ പ്രാർത്ഥന കൂടുകയും ചെയ്തിട്ടുണ്ടെന്നും അതൊക്കെ നമുക്ക് കിട്ടുന്ന അനുഗ്രഹങ്ങളാണെന്നും മിഥുൻ പറയുന്നു. മമ്മൂക്ക ആദ്യദിവസം തന്നെ വിളിച്ച് രോഗവിവരം അന്വേഷിച്ചതിനെക്കുറിച്ചും അദ്ദേഹം വെളിപ്പെടുത്തി.

' അദ്ദേഹം ഇതുവരെയും നേരിട്ട് വിളിച്ചിട്ടില്ല. എന്തെങ്കിലും കാര്യമുണ്ടെങ്കിൽ മമ്മൂക്കയ്ക്ക് ഒപ്പമുള്ളവരാണ് വിളിക്കുക. ഇത്തവണ അദ്ദേഹം നേരിട്ട് വിളിച്ചു. മോനേ നിനക്ക് എന്ത് പറ്റിയെടാ എന്നാണ് ചോദിച്ചത്. സുരേഷേട്ടൻ വിളിച്ചു.ദിലീപേട്ടൻ ഡോക്ടർമാരോട് സംസാരിച്ചു. ചാക്കോച്ചൻ നേരിട്ട് ആശുപത്രിയിൽ വന്നു. രമേശ് പിഷാരടി, അനൂപ് മേനോൻ. ടൊവിനോ തോമസ്, ഉണ്ണി മുകുന്ദൻ എല്ലാവരും വിളിച്ച് കാര്യങ്ങൾ അന്വേഷിച്ചു.'- മിഥുൻ രമേശ് പറഞ്ഞു.