ദേശീയ നഗര ഉപജീവന ദൗത്യം: കേരളം രണ്ടാമത്; 15 കോടി സമ്മാനം

തിരുവനന്തപുരം : കേന്ദ്ര പദ്ധതിയായ ദീൻ ദയാൽ അന്ത്യോദയ യോജന ദേശീയ നഗര ഉപജീവന ദൗത്യം(എൻ.യു.എൽ.എം)മികച്ച രീതിയിൽ നടപ്പാക്കുന്ന സംസ്ഥാനങ്ങൾക്ക് കേന്ദ്ര ഭവന നഗരകാര്യ മന്ത്രാലയം ഏർപ്പെടുത്തിയ 2021- 22ലെ സ്‌പാർക്ക് റാങ്കിംഗിൽ കേരളം രണ്ടാം സ്ഥാനം നേടി. തുടർച്ചയായി അഞ്ചാം തവണയാണ് സ്‌പാർക്ക് അവാർഡ് കേരളത്തിന് ലഭിക്കുന്നത്. 15 കോടി രൂപയാണ് അവാർഡ് തുക.

രാജ്യത്ത് 29സംസ്ഥാനങ്ങളിലെയും എട്ട് കേന്ദ്രസഭരണ പ്രദേശങ്ങളിലെയും നഗരമേഖലയിൽ എൻ.യു.എൽ.എം പദ്ധതി നടപ്പാക്കുന്നുണ്ട്. ഇതിൽ ആന്ധ്രാപ്രദേശാണ് ഒന്നാമത്. കഴിഞ്ഞ വർഷം കേരളം ഒന്നാമതെത്തിയിരുന്നു. സംസ്ഥാനത്ത് കുടുംബശ്രീ മുഖേന 93 നഗരസഭകളിലും പദ്ധതി നടപ്പാക്കുന്നു. ഇതിന്റെ ഭാഗമായി 24893 അയൽക്കൂട്ടങ്ങൾ രൂപീകരിക്കുകയും 24860 പേർക്ക് നൈപുണ്യ പരിശീലനം ലഭ്യമാക്കുകയും ചെയ്തു. ഇതിൽ 21576 പേർക്ക് സർട്ടിഫിക്കറ്റ് ലഭ്യമാക്കി. 13736 പേർക്ക് തൊഴിൽ നൽകി. ഉപജീവന മേഖലയിൽ 5704 വ്യക്തിഗത സംരംഭങ്ങളും 1187 ഗ്രൂപ്പ് സംരംഭങ്ങളും ആരംഭിച്ചു.