ചർച്ചയായി 2019ലെ ലോകായുക്ത വിധി

തിരുവനന്തപുരം: മുഖ്യമന്ത്രിക്കെതിരായ ദുരിതാശ്വാസ നിധി ദുർവിനിയോഗക്കേസിൽ 2019ൽ ലോകായുക്തയായിരുന്ന ജസ്റ്റിസ് പയസ് സി. കുര്യാക്കോസ് അദ്ധ്യക്ഷനായ ഫുൾബെഞ്ചിന്റെ ഉത്തരവ് ചർച്ചാവിഷയമാവുന്നു. ലോകായുക്തയും ഉപലോകായുക്തയായിരുന്ന ജസ്റ്റിസ് കെ.പി. ബാലചന്ദ്രനുമാണ് മുഖ്യമന്ത്രിക്ക് തിരിച്ചടിയായ ഉത്തരവിറക്കിയത്. ഉപലോകായുക്ത ജസ്റ്റിസ് എ.കെ. ബഷീറിന്റേത് ഭിന്നവിധിയായിരുന്നു. ഈ ഭൂരിപക്ഷ ഉത്തരവുണ്ടായിരിക്കെയാണ് ഹർജി നിലനിൽക്കുന്നതാണോയെന്നും മന്ത്രിസഭ തീരുമാനം ലോകായുക്തയ്ക്ക് അന്വേഷിക്കാനാവുമോ എന്നും പരിശോധിക്കാൻ ഫുൾബെഞ്ചിന്റെ പരിഗണയ്ക്ക് വിട്ട് രണ്ടംഗബെഞ്ച് മാർച്ച് 31ന് ഉത്തരവിറക്കിയത്. ഇതിനെതിരായ റിവ്യൂഹർജിയാണ് ഇന്നലെ തള്ളിയത്.

ജസ്റ്റിസ് പയസ് സി.കുര്യാക്കോസിന്റെ ഉത്തരവ്

നിലവിലെ ചട്ടങ്ങൾ ലംഘിച്ചാണ് ഫണ്ട് അനുവദിച്ചത്. മുഖ്യമന്ത്രിയുടെ വിവേചനാധികാരമാണെങ്കിൽ കൂടിയും 3 ലക്ഷത്തിന് മുകളിൽ തുക അനുവദിക്കാൻ കഴിയില്ല. അപേക്ഷയില്ലാതെയാണ് പണം അനുവദിച്ചത്. മന്ത്രിസഭായോഗത്തിൽ അജൻഡയ്ക്ക് പുറത്തുള്ള ഇനമായി കൊണ്ടുവന്നു. കാബിനറ്റ് നോട്ടോ ഫയലോ ഇല്ല. വരുമാന പരിധി കണക്കിലെടുത്തില്ല. അതിനാൽ തീരുമാനത്തിൽ സുതാര്യതയില്ല. ഇത്തരം നടപടികൾക്ക് 'മന്ത്രിസഭാ തീരുമാനം ' എന്ന പരിരക്ഷ ലഭിക്കില്ലെന്ന് ലാവ്‌ലിൻ, പാമോയിൽ കേസുകളിൽ വ്യക്തമായിട്ടുണ്ട്. സ്വജനപക്ഷപാതം നടന്നിട്ടുണ്ടെന്ന് വ്യക്തമാണ്. വിവേചനാധികാരം എന്നാൽ ഏകപക്ഷീയമായ തീരുമാനമെടുക്കലല്ല. അതിനാൽ അന്വേഷണം നടക്കേണ്ടതുണ്ട്.

ജസ്റ്റിസ് കെ.പി. ബാലചന്ദ്രന്റെ ഉത്തരവ്

സർക്കാരും സർക്കാരുദ്യോഗസ്ഥരും ലോകായുക്ത പരിധിയിൽ വരും. അധികാര ദുർവിനിയോഗവും സ്വജനപക്ഷപാതവും നടത്തിയിട്ടുണ്ടെന്നാണ് കേസ്. അതുകൊണ്ടുതന്നെ ഈ പരാതി അന്വേഷിക്കാൻ ലോകായുക്തയ്ക്ക് അധികാരമുണ്ട്. മന്ത്രിസഭ തീരുമാനമാണ് എന്നതിന്റെ പേരിൽ അന്വേഷണം ഒഴിവാക്കാനാവില്ല. സർക്കാർ എടുക്കുന്ന എല്ലാ തീരുമാനങ്ങളും അന്വേഷണ പരിധിയിൽ വരുമെന്ന് ചട്ടമുണ്ട്.