ആയുഷ്‌മാൻ ഖുറാനയുടെ നായികയായി സാമന്ത

ബോളിവുഡ് അരങ്ങേറ്റത്തിന് ഒരുങ്ങി സാമന്ത. ദി ഫാമിലി മാൻ ഹിന്ദി വെബ്‌ സീരീസിനുശേഷം സാമന്ത അഭിനയിക്കുന്ന ആദ്യ ബോളിവുഡ് ചിത്രത്തിൽ ആയുഷ്‌മാൻ ഖുറാന ആണ് നായകൻ. വാംപയർസ് ഒഫ് വിജയ് നഗർ എന്ന ചിത്രം അമർ കൗശിക് സംവിധാനം ചെയ്യുന്നു. രണ്ടു വേഷങ്ങളിലാണ് സാമന്ത എത്തുക. ഈ വർഷം അവസാനത്തോടെ ചിത്രീകരണം ആരംഭിക്കാനാണ് തീരുമാനം. ഹൊറർ വാംപയർ ജോണർ ഗണത്തിൽപ്പെട്ടതാണ് ചിത്രം. സ്ത്രീ, ബാല, ഭേദിയ എന്നീ ചിത്രങ്ങൾക്ക് ശേഷം അമർ കൗശിക് സംവിധാനം ചെയ്യുന്ന ചിത്രം എന്നതാണ് മറ്റൊരു പ്രത്യേകത. സ്‌ത്രീ 2, ഭേദിയ 2 എന്നീ ചിത്രങ്ങൾ ചേർത്തുകൊണ്ടാണ് അമർ വാംപയർസ് ഒഫ് വിജയ്‌ നഗർ ഒരുക്കുക. അതേസമയം ഫാമിലി മാനിൽ മികച്ച പ്രകടനമായിരുന്നു സാമന്തയുടേത്. മനോജ് ബാജ്‌പേയ് കേന്ദ്ര കഥാപാത്രമായി എത്തുന്ന സീരീസിൽ പ്രിയാമണി, നീരജ് മാധവ് എന്നിവരും പ്രധാന വേഷത്തിൽ എത്തിയിരുന്നു.