ഷൂട്ടിംഗ് പുരോഗമിക്കുന്നു

സിനിമാ ടിക്കറ്റ് പ്രൊഡക്‌ഷൻസിന്റെ ബാനറിൽ നവാഗതരായ സഞ്ജു കൃഷ്ണ വടകരയും ബിൻസി കൊടുങ്ങല്ലൂരും ചേർന്ന് സംവിധാനം ചെയ്യുന്ന പുതിയ ചിത്രത്തിന്റെ ഷൂട്ടിംഗ് പാലക്കാട് കൊല്ലംകോട് ചിറ്റൂർ മേഖലകളിൽ പുരോഗമിക്കുന്നു. സാമൂഹ്യ പ്രാധാന്യമുള്ള കഥ പറയുന്ന ചിത്രത്തിൽ ഏറെക്കുറെ പുതുമുഖങ്ങളാണ് അഭിനയിക്കുന്നത് . പാശ്ചാത്യസംസ്കാരത്തിന്റെ ഭാഗമായുള്ള പുതിയ തലമുറയുടെ ഭക്ഷണരീതിയിലുണ്ടായ മാറ്റങ്ങളും അതുണ്ടാക്കുന്ന വലിയ അപകടങ്ങളുമാണ് ഇതിവൃത്തം. ഹോട്ടൽ ലോബികളുടെയും രാഷ്ട്രീയക്കാരുടെയും നിയമജ്ഞരുടെയും അവിശുദ്ധ കൂട്ടുകെട്ടിലൂടെ സാധാരണക്കാരിലേക്ക് പഴക്കം ചെന്ന ഭക്ഷണപദാർത്ഥങ്ങൾ വീണ്ടും വിൽപ്പന നടത്തി ഏഴു വയസുകാരിയെ നഷ്ടപ്പെട്ട ഒരച്ഛന്റെ നിയമ പോരാട്ടമാണ് സിനിമയുടെ കഥ .എന്നാൽ ഹോട്ടൽ ഉടമകളുടെയും രാഷ്ട്രീയ നേതാക്കന്മാരുടെയും പൊലീസുകാരുടെയും തെറ്റായ നിയമവ്യവസ്ഥയുടെയും ഫലമായി ഇവർക്കെതിരെ ഒന്നും ചെയ്യാൻ പറ്റാതെ കോടതിയിൽ നിന്നും ഹോട്ടൽ ലോബികൾക്ക് അനുകൂലമായി വിധി വരുന്നിടത്ത് സിനിമ അവസാനിക്കുന്നു. ചിത്രത്തിന്റെ ഡി.ഓ.പി ബിൻസീർ കൊടുങ്ങല്ലൂർ ആണ്. മേയ് അവസാനത്തോടുകൂടി ചിത്രം തിയേറ്ററിലെത്തുമെന്ന് അണിയറ പ്രവർത്തകർ അറിയിച്ചു.