ജിയോ ബാഗ് കടൽഭിത്തി

കൊച്ചി: ചെല്ലാനം ഗ്രാമപഞ്ചായത്തിലെ കണ്ണമാലി, ചെറിയകടവ്, കാട്ടിപ്പറമ്പ് പ്രദേശങ്ങളിൽ ജിയോ ബാഗ് ഉപയോഗിച്ചുള്ള കടൽഭിത്തി നിർമ്മാണം ഉടൻ ആരംഭിക്കണമെന്ന് കളക്ടർ എൻ.എസ്.കെ. ഉമേഷ് ഉദ്യോഗസ്ഥർക്ക് നിർദ്ദേശം നൽകി.ടെട്രാപോഡ് കടൽഭിത്തി പദ്ധതിയിൽ ഉൾപ്പെടാത്ത മേഖലകളിലാണ് ജിയോ ബാഗ് കടൽഭിത്തി നിർമ്മിക്കുന്നത്. ഇതിനായി ദുരന്ത നിവാരണഫണ്ടിൽ നിന്ന് 14 ലക്ഷം രൂപ അനുവദിച്ചു. മൂന്ന് വാർഡുകളിലായി 420 മീറ്റർ നീളത്തിൽ ജലവിഭവ വകുപ്പാണ് നിർമ്മാണം. പഞ്ചായത്തിലെ മറ്റ് മഴക്കാലപൂർവ ശുചീകരണ പ്രവർത്തനങ്ങൾ പുരോഗമിക്കുന്നു. 24 ശതമാനം വീടുകളിൽ മാത്രം പ്രവർത്തിക്കുന്ന ഹരിതകർമ്മസേനയുടെ പ്രവർത്തനം കൂടുതൽ മേഖലകളിലേക്ക് വ്യാപിപ്പിക്കും.