കാട്ടാന വൈദ്യുതാഘാതമേറ്റ് ചെരി​ഞ്ഞ സംഭവം , സർക്കാർ ഉദ്യോഗസ്ഥയും മാതാവും അറസ്റ്റി​ൽ

പത്തനാപുരം: കടശ്ശേരിയിലെ സ്വകാര്യ റബർ തോട്ടത്തിൽ കാട്ടാന വൈദ്യുതാഘാതമേറ്റ് ചെരി​ഞ്ഞ സംഭവത്തിൽ സർക്കാർ ഉദ്യോഗസ്ഥയും മാതാവും അറസ്റ്റിൽ. ഒന്നാം പ്രതി ശിവദാസൻ ഒളി​വി​ലാണ്. ശിവദാസന്റെ ഭാര്യയും രണ്ടാം പ്രതിയുമായ പുന്നല ചെളിക്കുഴി തെക്കേക്കര പുത്തൻവീട്ടിൽ സുശീലയും (63) മൂന്നാം പ്രതിയും സുശീലയുടെ മകളുമായ ചുനക്കര വെറ്ററി​നറി​ ഡിസ്പെൻസറി കോമല്ലൂർ സബ് സെന്ററി​ലെ ലൈവ് സ്റ്റോക്ക് ഇൻസ്പെക്ടർ സ്മിതയുമാണ് (39) അറസ്റ്റിലായത്.

പുന്നല മോഡൽ ഫോറസ്റ്റ് സ്റ്റേഷനിലാണ് കേസ് രജിസ്റ്റർ ചെയ്തത്. ആന ഷോക്കേറ്റ് ചെരിയാൻ കാരണമായ വൈദ്യുത ഉപകരണങ്ങൾ അഴിച്ചു മാറ്റാൻ സഹായി​ച്ചുവെന്നതാണ് സ്മി​തയ്ക്കെതി​രായ കേസ്. സുശീലയെ കടശ്ശേരിയിൽ നിന്നും സ്മിതയെ ചാരുംമൂട് ബി.എസ്.എൻ.എൽ ക്വാർട്ടേഴ്സിൽ നിന്നും പത്തനാപുരം റേഞ്ച് ഫോറസ്റ്റ് ഓഫീസർ ദിലീപി​ന്റെ നേതൃത്വത്തിലാണ് അറസ്റ്റ് ചെയ്തത്.

ഒളിച്ചു വച്ചിരുന്ന വൈദ്യുത വയറുകളും കമ്പികളും പ്രതികളുടെ സാന്നിദ്ധ്യത്തിൽ കണ്ടെടുത്തു. പുനലൂർ വനം കോടതി മുമ്പാകെ ഹാജരാക്കിയ പ്രതികളെ റിമാൻഡ് ചെയ്തു.