ഈ ലക്ഷണങ്ങൾ കണ്ടുകഴിഞ്ഞാൽ സ്കൂളിലോ ഓഫീസിലോ പോകരുത്, ആരോഗ്യവകുപ്പിന്റെ മുന്നറിയിപ്പ്

കൊല്ലം: ജില്ലയിൽ എച്ച് വൺ എൻ വൺ പനി റിപ്പോർട്ട് ചെയ്ത സാഹചര്യത്തിൽ കർശന ജാഗ്രത പാലിച്ച് യഥാസമയം ചികിത്സ തേടണമെന്ന് ആരോഗ്യവകുപ്പിന്റെ മുന്നറിയിപ്പ്. വായുവിലൂടെ പകരുന്ന വൈറസ് രോഗമാണിത്. സാധാരണക്കാരിൽ രോഗലക്ഷണങ്ങൾ ഒന്ന് മുതൽ രണ്ടാഴ്ചക്കകം കുറയുമെങ്കിലും ഗർഭിണികൾ, പ്രസവം കഴിഞ്ഞ് രണ്ടാഴ്ചക്കുള്ളിലുള്ള അമ്മമാർ, രണ്ടു വയസിൽ താഴെയുള്ള കുട്ടികൾ, മുതിർന്നവർ, മറ്റു ഗുരുതരരോഗങ്ങൾ ഉള്ളവർ എന്നിവർ ചികിത്സ തേടിയില്ലെങ്കിൽ മരണം വരെ സംഭവിക്കാം.

ചെറിയ കുട്ടികളിൽ പനി, ഛർദ്ദി, അപസ്മാര ലക്ഷണങ്ങൾ കണ്ടാൽ ഉടനെ ചികിത്സ തേടണം. എച്ച് വൺ എൻ വൺ പനിക്ക് ഫലപ്രദമായ ഒസൽട്ടമാവിർ ഗുളിക എല്ലാ സർക്കാർ ആരോഗ്യകേന്ദ്രങ്ങളിലും സൗജന്യമായി ലഭിക്കും.

രോഗികൾ ശ്രദ്ധിക്കേണ്ട കാര്യങ്ങൾ

വീടിനുള്ളിൽ പൂർണമായി വിശ്രമിക്കുക

സ്‌കൂൾ, ഓഫീസ് എന്നിവിടങ്ങളിൽ നിന്ന് വിട്ടുനിൽക്കുക

മാസ്‌ക് ധരിക്കുക, അകലം പാലിക്കുക

ഇടയ്ക്കിടെ സോപ്പ് ഉപയോഗിച്ച് കൈ കഴുകുക

പോഷകഗുണമുള്ള ആഹാരവും പാനീയങ്ങളും കഴിക്കുക

ലക്ഷണങ്ങൾ

 പനി

 ചുമ

 തലവേദന

 പേശിവേദന

 സന്ധിവേദന

 തൊണ്ടവേദന

 മൂക്കൊലിപ്പ്

 ജലദോഷം

 വിറയൽ

 ക്ഷീണം

 ശ്വാസംമുട്ടൽ

 ചിലപ്പോൾ ഛർദ്ദിയും വയറിളക്കവും