മത്സ്യത്തൊഴിലാളികളോട് കയർത്ത് സംസാരിച്ചത് മന്ത്രിമാർ‌, ഉത്തരവാദപ്പെട്ട സ്ഥാനത്തിരുന്ന് നിരുത്തരവാദപരമായി പെരുമാറരുത്, ശിവൻകുട്ടിക്കെതിരെ ഫാ. യൂജിൻ പെരേര

തിരുവനന്തപുരം: മുതലപ്പൊഴിയിൽ മന്ത്രിമാരെ തടയാൻ മത്സ്യത്തൊഴിലാളികളോട് ആഹ്വാനം ചെയ്തെന്ന മന്ത്രി വി.ശിവൻകുട്ടിയുടെ ആരോപണത്തിന് മറുപടിയുമായി അതിരൂപതാ വികാരി ജനറൽ ഫാ. യൂജിൻ പെരേര. ഉത്തരവാദപ്പെട്ട സ്ഥാനത്തിരുന്ന് മന്ത്രി നിരുത്തരവാദപരമായ പ്രസ്താവന നടത്തരുതെന്ന് യൂജിൻ പെരേര പറഞ്ഞു. മന്ത്രിമാരാണ് മത്സ്യത്തൊഴിലാളികളോട് കയർത്ത് സംസാരിച്ചത്. അവിടെ സഖാക്കളെ നിരത്തി ഒരു നാടകത്തിനാണ് മന്ത്രിമാർ ശ്രമിച്ചത്. അത് നടക്കാതിരുന്നപ്പോഴാണ് പ്രസ്താവന നടത്തുന്നതെന്നും അദ്ദേഹം കുറ്റപ്പെടുത്തി.

വിഴിഞ്ഞം സമരം ആസൂത്രിതമായി അട്ടിമറിക്കാൻ ശ്രമിച്ചുവെന്നും യൂജിൻ പെരേര പറഞ്ഞു. ഈ നാട് വെള്ളത്തിൽ മുങ്ങി നിന്നപ്പോൾ രക്ഷാപ്രവർത്തനത്തിന് ഇറങ്ങിയ സഭയാണിത്. ആ സഭ കലാപാഹ്വാനം ചെയ്തുവെന്നാണ് പറയുന്നത്. പള്ളികളിൽ അനധികൃത പിരിവ് നടത്തുന്നില്ല. മുസ്ലിം ,​ ധീവര സമുദായങ്ങളെല്ലാം അവരുടെ അംഗങ്ങളിൽ നിന്ന് സംഭാവന വാങ്ങുന്നുണ്ട്. സഭാ അംഗങ്ങളുടെ വിദ്യാഭ്യാസത്തിനും പുരോഗതിക്കുമാണ് ഈ പണം വിനിയോഗിക്കുന്നതെന്നും അദ്ദേഹം പറഞ്ഞു.

മന്ത്രി എന്നോട് ഷോ കാണിക്കരുതെന്ന് പറഞ്ഞു. ആന്റണി രാജുവും മത്സ്യത്തൊഴിലാളികളോട് ക്ഷുഭിതനായി സംസാരിച്ചു,​ സർക്കാർ ചെയ്യേണ്ട കാര്യങ്ങൾ ചെയ്യാത്തത് കൊണ്ടാണ് സഭക്ക് ചെയ്യേണ്ടി വരുന്നത്. വിഴിഞ്ഞത്ത് നടന്ന കാര്യങ്ങളെ കുറിച്ച് ഒരു പുസ്തകം സഭ പ്രസിദ്ധീകരിക്കും. മന്ത്രി എന്നോട് ഷോ കാണിക്കരുതെന്ന് പറഞ്ഞു. ആന്റണി രാജുവും മത്സ്യത്തൊഴിലാളികളോട് ക്ഷുഭിതനായി സംസാരിച്ചു. കൈയിലിരിക്കുന്ന പവർ പോകുമ്പോഴാണ് ഇത്തരം പ്രസ്താവനകളെന്നും തീരദേശ മത്സ്യത്തൊഴിലാളികൾക്ക് നൽകിയ വാക്ക് പാലിക്കണമെന്നും യൂജിൻ പെരേര ആവശ്യപ്പെട്ടു.