മൂന്നാറിലെ  കൈയേറ്റം  ഒഴിപ്പിക്കാൻ കളക്ടറുടെ നേതൃത്വത്തിൽ  പ്രത്യേക  ദൗത്യസംഘം; ജനങ്ങളുടെ മെക്കിട്ട് കേറാൻ ശ്രമിച്ചാൽ തുരത്തുമെന്ന് എം  എം  മണി

തൊടുപുഴ: മൂന്നാറിലെ കൈയേറ്റം ഒഴിപ്പിക്കാൻ പ്രത്യേക ദൗത്യസംഘം വരുന്നതിൽ എതിർപ്പില്ലെന്ന് എം എം മണി എം എൽ എ. അനധികൃതമായി ഭൂമി കൈയേറിയിട്ടുണ്ടെങ്കിൽ പരിശോധിക്കട്ടെ. അതിന് തടസം നിൽക്കില്ല. എന്നാൽ കാലങ്ങളായി ഇവിടെ താമസിക്കുന്നവരുടെ മെക്കിട്ട് കേറാനാണ് പരിപാടിയെങ്കിൽ ഏത് ദൗത്യസംഘമായാലും ചെറുക്കുക തന്നെ ചെയ്യുമെന്നും അദ്ദേഹം വ്യക്തമാക്കി.

നിയമപരമല്ലാതെ രാഷ്ട്രീയ ലക്ഷ്യം വച്ച് എന്തെങ്കിലും ചെയ്യാൻ വന്നാൽ തുരത്തുമെന്ന കാര്യത്തിൽ ഒരു സംശയവും വേണ്ടെന്നും എം എം മണി പറഞ്ഞു. ഇടുക്കിയിലെ കൈയേറ്റങ്ങൾ ഒഴിപ്പിക്കുന്നതിന് ജില്ലാ കളക്ടറുടെ നേതൃത്വത്തിൽ പ്രത്യേക ദൗത്യസംഘം രൂപീകരിച്ചതിനോട് പ്രതികരിക്കുകയായിരുന്നു അദ്ദേഹം. ജില്ലാ കളക്ടർക്ക് പുറമെ സബ് കളക്ടറും ആർ ഡി ഒയും ഉൾപ്പെട്ടതാണ് ദൗത്യസംഘം.

കൈയേറ്റങ്ങൾ നീക്കം ചെയ്യാൻ പ്രത്യേക ടീമിനെ നിയോഗിക്കുന്നതുമായി സംബന്ധിച്ച് ഹെെക്കോടതി സർക്കാരിന്റെ നിലപാട് തേടിയിരുന്നു. ഇതനുസരിച്ചാണ് ഉത്തരവിറക്കിയത്. ദൗത്യസംഘത്തിന്റെ പ്രതിവാര പുരോഗതി ജോയിന്റ് കമ്മിഷണര്‍ വിലയിരുത്തും. കെെയേറ്റം ഒഴിപ്പിക്കാൻ ജില്ലാ പൊലീസ് മേധാവി മതിയായ സുരക്ഷ ഒരുക്കണം. വനം, പൊതുമരാമത്ത്, തദ്ദേശ ഭരണവകുപ്പുകൾ ആവശ്യമായ സഹായങ്ങൾ നൽകണമെന്നും ഉത്തരവിൽ പറയുന്നു.