കെ സുധാകരന്റെ മാനനഷ്ടക്കേസ്; സിപിഎം നേതാക്കൾക്ക് കോടതി നോട്ടീസ്, ജനുവരി 12ന് ഹാജരാകണം

കൊച്ചി: കെ പി സി സി പ്രസിഡന്റ് കെ സുധാകരൻ നൽകിയ മാനനഷ്ടക്കേസിൽ എതിർകക്ഷികൾക്ക് കോടതി നോട്ടീസ്. എറണാകുളം സി ജെ എം കോടതിയാണ് നോട്ടീസ് അയച്ചത്. സി പിഎം നേതാക്കളായ എം വി ഗോവിന്ദൻ, പി പി ദിവ്യ, ദേശാഭിമാനി പത്രാധിപർ എന്നിവർക്കാണ് നോട്ടീസ് നൽകിയിരിക്കുന്നത്. ജനുവരി 12ന് ഹാജരാകാനാണ് നിർദേശം. മോൻസൻ മാവുങ്കലിനെതിരായ പോക്സോ കേസുമായി ബന്ധപ്പെട്ട് ഉന്നയിച്ച ആരോപണത്തിലാണ് കെ സുധാകരൻ മാനനഷ്ട കേസ് സമർപ്പിച്ചത്.

മോൻസൺ മാവുങ്കലിനെതിരായ പോക്‌സോ കേസിൽ കെ സുധാകരൻ കൂട്ടുപ്രതിയാണെന്ന് ജൂണിൽ എം വി ഗോവിന്ദൻ തിരുവനന്തപുരത്ത് നടന്ന വാർത്താസമ്മേളനത്തിൽ പറഞ്ഞിരുന്നു. മോൻസൺ മാവുങ്കൽ തന്നെ പീഡിപ്പിക്കുമ്പോൾ കെ സുധാകരൻ അവിടെയുണ്ടായിരുന്നുവെന്ന് അതിജീവിത മൊഴി നൽകിയിട്ടുണ്ട്. പീഡനവിവരം അറിഞ്ഞിട്ടും സുധാകരൻ ഇടപെട്ടില്ലെന്ന് മൊഴിയിലുണ്ടെന്നും ഗോവിന്ദൻ വ്യക്തമാക്കിയിരുന്നു.

എന്നാൽ മനസാ വാചാ അറിയാത്ത കാര്യമാണിതെന്നും തനിക്ക് പോക്‌സോ കേസുമായി ബന്ധമില്ലെന്നും അന്ന് കെ സുധാകരൻ വാർത്താസമ്മേളനത്തിൽ പ്രതികരിച്ചിരുന്നു. താനവിടെയുണ്ടായിരുന്നുവെന്ന് അതിജീവിത പറഞ്ഞിട്ടില്ല. സാക്ഷികളാരും പറഞ്ഞിട്ടില്ല. ഇര നൽകാത്ത മൊഴി സി പി എമ്മിന് എങ്ങനെ കിട്ടിയെന്ന് വ്യക്തമാക്കണം. ആരോപണം തെളിയിച്ചാൽ രാഷ്‌ട്രീയ ജീവിതം അവസാനിപ്പിക്കും. 164 രഹസ്യമൊഴിയാണ് പെൺകുട്ടി നൽകിയത്. അതെങ്ങനെ സി പി എമ്മിന് ലഭ്യമായെന്നതിൽ വ്യക്തത വരുത്തണമെന്നും സുധാകരൻ പറഞ്ഞിരുന്നു. അതിന് പിന്നാലെയാണ് അദ്ദേഹം കോടതിയിൽ മാനനഷ്ടക്കേസ് സമർപ്പിച്ചത്.