ആശുപത്രിയിൽ അക്രമം നടത്തിയ യുവാക്കൾ അറസ്റ്റിൽ

കൊല്ലം: കരുനാഗപ്പള്ളി താലൂക്ക് ആശുപത്രിയിൽ അക്രമം നടത്തിയ യുവാക്കൾ പൊലീസ് പിടിയിലായി. മൈനാഗപ്പള്ളി ഷൈൻ മൻസിലിൽ ഷാനു(25), മൈനാഗപ്പള്ളി തടത്തിൽ പുത്തൻവീട്ടിൽ ലിജോ(24) എന്നിവരാണ് കരുനാഗപ്പള്ളി പൊലീസിന്റെ പിടിയിലായത്. ഷാനുവും ലിജോയും ഇവരുടെ സുഹൃത്തായ നാസിമിന് വാഹനാപകടത്തിൽ പരിക്കേറ്റതിനെ തുടർന്ന് കരുനാഗപ്പള്ളി താലൂക്ക് ആശുപത്രിയിൽ എത്തിയതായിരുന്നു. ചികിത്സക്കിടയിൽ പ്രതികൾ ആശുപത്രി ജീവനക്കാരുമായി തർക്കമുണ്ടായി. തുടർന്ന് സെക്യൂരിറ്റി ജീവനക്കാരനെ മർദ്ദിക്കുകയായിരുന്നു. ആശുപത്രിയിലെ ക്യാഷ്വാലിറ്റി ഓഫീസർ നൽകിയ പരാതിയുടെ അടിസ്ഥാനത്തിൽ കരുനാഗപ്പള്ളി പൊലീസ് രജിസ്റ്റർ ചെയ്ത കേസിലാണ് അറസ്റ്റ്. ഷാനുവിനെതിരെ മോഷണം, മാനഭംഗപ്പെടുത്തൽ തുടങ്ങിയ വകുപ്പുകൾക്ക് കേസുകൾ നിലവിലുണ്ട്. ലിജോയ്‌ക്കെതിരെ വിവിധ പൊലീസ് സ്റ്റേഷനുകളിലായി ആറ് മോഷണക്കേസുകളും മാനഭംഗക്കേസും നർക്കോട്ടിക്ക് കേസും നിലവിലുണ്ട്.