'എന്താ പടം'; ആവേശം സിനിമയ്ക്ക് മൃണാൾ താക്കൂർ പറഞ്ഞ മറുപടി ഇങ്ങനെ

ഫഹദ് ഫാസിൽ നായകനായി കഴിഞ്ഞ മാസം തിയേറ്ററുകളിലെത്തിയ ആവേശം എന്ന സിനിമയ്ക്ക് മികച്ച പ്രതികരണങ്ങളാണ് ലഭിച്ചുക്കൊണ്ടിരിക്കുന്നത്. ഫഹദ് അവതരിപ്പിച്ച രംഗണ്ണനെ തിയേറ്ററുകളിൽ മാത്രമല്ല ഇൻസ്റ്റഗ്രാം റീലുകളിലും പ്രേക്ഷകർ ഏറ്റെടുത്തിരിക്കുകയാണ്. ഇപ്പോഴിതാ ആവേശം കണ്ട നടി മൃണാൾ താക്കൂറിന്റെ പ്രതികരണങ്ങളാണ് സോഷ്യൽമീഡിയയിൽ വൈറലാകുന്നത്.

സംവിധായകൻ ജിത്തുമാധവിനെയും ഫഹദിനെയും നസ്രിയയെയും മെൻഷൻ ചെയ്തുകൊണ്ടാണ് മൃണാൾ താക്കൂർ സിനിമയുടെ പ്രതികരണം അറിയിച്ചിരിക്കുന്നത്. 'എന്താ പടം, സിനിമയിലെ എല്ലാ ഭാഗവും ഇഷ്ടമായി, ആവേശം ഉറപ്പായും കണ്ടിരിക്കേണ്ട് സിനിമ' എന്നാണ് താരം ഇൻസ്റ്റഗ്രാം സ്റ്റോറിയിൽ കുറിച്ചിരിക്കുന്നത്. നിരവധി തെന്നിന്ത്യൻ താരങ്ങളാണ് ഇതിനോടകം ആവേശം സിനിമ കണ്ടിട്ട് അഭിനന്ദനങ്ങളുമായി സോഷ്യൽമീഡിയയിൽ എത്തിയത്. സമന്ത, നയൻതാര, വിഘ്നേഷ് ശിവൻ എന്നിവരും ആവേശം പോസ്റ്റ് പങ്കുവച്ചിരുന്നു.

അൻവർ റഷീദ് എന്റർടെയ്ൻമെന്റ്‌സിന്റെ ബാനറിൽ അൻവർ റഷീദും ഫഹദ് ഫാസിൽ ആൻഡ് ഫ്രണ്ട്‌സിന്റെ ബാനറിൽ നസ്രിയ നസീമും ചേർന്നാണ് ആവേശം നിർമിച്ചത്. ആദ്യ ദിവസം കേരളത്തിൽ നിന്നും 3.5 കോടി വാരിയപ്പോൾ ആഗോള കളക്‌ഷനായി ലഭിച്ചത് 10.57 കോടിയായിരുന്നു. ആശിഷ് വിദ്യാർത്ഥി,മൻസൂർ അലി ഖാൻ, സജിൻ ഗോപു, ഹിപ്സ്റ്റർ, മിഥുൻ ജെഎസ്, റോഷൻ ഷാനവാസ്, പൂജ മോഹൻ രാജ്, നീരജ രാജേന്ദ്രൻ, ശ്രീജിത്ത് നായർ, തങ്കം മോഹൻ എന്നിവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്.