കത്തനാറിൽ അനുഷ്കയുടെ റോൾ എന്ത്? വീഡിയോ പങ്കുവച്ച് നടൻ ജയസൂര്യ

സിനിമ പ്രേമികൾ ഏറെ പ്രതീക്ഷയോടെ കാത്തിരിക്കുന്ന ബിഗ് ബഡ്‌ജറ്റ് ചിത്രമാണ് കത്തനാർ. റോജിൻ തോമസ് സംവിധാനം ചെയ്യുന്ന ചിത്രത്തിൽ ജയസൂര്യയാണ് കേന്ദ്രകഥാപാത്രത്തെ അവതരിപ്പിക്കുന്നത്. തെന്നിന്ത്യൻ താര റാണി അനുഷ്ക ഷെട്ടിയാണ് നായിക. അനുഷ്കയുടെ ആദ്യ മലയാളം സിനിമ കൂടിയാണിത്. ചിത്രത്തിന്റെ ഷൂട്ടിംഗ് പൂർത്തിയായി ഇപ്പോൾ പോസ്റ്റ് പ്രൊഡക്ഷനിലാണ്.

ഇപ്പോഴിതാ ചിത്രത്തിലെ നായികയായ അനുഷ്കയുടെ ക്യാരക്ടർ പോസ്റ്റർ പുറത്തുവിട്ടിരിക്കുകയാണ്. നടൻ ജയസൂര്യ തന്റെ ഇൻസ്റ്റഗ്രാമിൽ ഇതിന്റെ വീഡിയോ പങ്കുവച്ചിട്ടുണ്ട്. 'നില' എന്ന റോളാണ് അനുഷ്ക കത്തനാറിൽ ചെയ്യുന്നത്. അനുഷ്കയുടെ ജന്മദിനത്തിലാണ് പോസ്റ്റ് പുറത്തുവിട്ടിരിക്കുന്നത്. ജയസൂര്യ നടിക്ക് ജന്മദിന ആശംസകളും നേർന്നിട്ടുണ്ട്. അനുഷ്കയും തന്റെ ഇൻസ്റ്റഗ്രാമിൽ ക്യാരക്ടർ പോസ്റ്റർ ചിത്രം പങ്കുവച്ചിട്ടുണ്ട്.

കത്തനാർ ചിത്രം ഗോകുലം മൂവീസിന്റെ ബാനറിൽ ഗോകുലം ഗോപാലനാണ് നിമ്മിക്കുന്നത്. ആ രാമാനന്ദ് ആണ് ചിത്രത്തിന്റെ തിരക്കഥ ഒരുക്കിയത്. ‘ഹോം’ സിനിമയിലൂടെ ദേശീയ പുരസ്‌കാരം നേടിയ റോജിൻ തോമസിന്റെ സംവിധാനത്തിലാണ് മലയാളത്തിലെ ഏറ്റവും മുതൽമുടക്കുള്ള ചിത്രമായി മാറിയേക്കാവുന്ന ‘കത്തനാർ’ ഒരുങ്ങുന്നത്.

ഏറ്റവും നൂതന സാങ്കേതികവിദ്യയായ വിഎഫ്എക്‌സ് ആന്‍ഡ് വെര്‍ച്വല്‍ പ്രൊഡക്ഷന്‍സിനലൂടെയാണ് സിനിമയുടെ അവതരണം. കൊറിയൻ വംശജനും കാനഡയിൽ താമസക്കാരനുമായ ജെ ജെ പാർക്ക് ആണ് ഈ ചിത്രത്തിന്റെ ആക്ഷൻ രംഗങ്ങൾ കമ്പോസ് ചെയ്യുന്നത്. ജെ ജെ പാർക്ക് നിരവധി വിദേശ ചിത്രങ്ങൾക്ക് വേണ്ടി ആക്ഷൻ രംഗങ്ങൾ ഒരുക്കിയിട്ടുണ്ട്. ക്യാമറ കെെകാര്യം ചെയ്യുന്നത് നീൽ ഡിക്കൂഞ്ഞയാണ്. സംഗീതം രാഹുൽ സുബ്രഹ്മണ്യം.