നിയമസഭാ തിരഞ്ഞെടുപ്പിൽ ഉറച്ച വോട്ടായ ഇവരെ ചേർത്ത്‌നിർത്താൻ ആം ആ‌ദ്‌മി പാർട്ടി,​ 10 ലക്ഷത്തിന്റെ ഇൻഷുറൻസ്

ന്യൂഡൽഹി: ഡൽഹി നിയമസഭാ തിരഞ്ഞെടുപ്പ് അടുത്തിരിക്കെ, ഉറച്ച വോട്ടുബാങ്കായ ഓട്ടോ ഡ്രൈവർമാരെ ചേർത്തുനിർത്താൻ ആം ആദ്മി പാർട്ടി. വീണ്ടും അധികാരത്തിലെത്തിയാൽ 10 ലക്ഷം രൂപ ഇൻഷുറൻസ് പോളിസി അടക്കം അഞ്ച് പദ്ധതികൾ നടപ്പാക്കുമെന്ന് പാർട്ടി ദേശീയ കൺവീനർ അരവിന്ദ് കേജ്രിവാൾ വാഗ്ദാനം ചെയ്തു.

കോൺഡ്ലി മണ്ഡലത്തിലെ നവ്നീത് എന്ന ഓട്ടോ ഡ്രൈവറുടെ വീട്ടിൽ സന്ദർശനം നടത്തി ഭക്ഷണവും കഴിച്ച ശേഷമാണ് പ്രഖ്യാപനം. ഓട്ടോ ഡ്രൈവർമാരുടെ പെൺമക്കളുടെ വിവാഹത്തിന് ഒരുലക്ഷം നൽകും. 2500 രൂപ യൂണിഫോം അലവൻസ്, സവാരി ബുക്ക് ചെയ്യുന്ന ആപ് സൗകര്യം, കുട്ടികൾക്ക് സർക്കാർ സ്പോൺസേർഡ് കോച്ചിംഗ് എന്നിവയും വാഗ്ദാനം ചെയ്തു.