ഗുരുമന്ദിരത്തിൽ മോഷണം

തലയോലപ്പറമ്പ്: എസ് എൻ ഡി പി യോഗം 4472ാം നമ്പർ വെട്ടിക്കാട്ടുമുക്ക് ശാഖാ ഗുരുമന്ദിരത്തിന് മുന്നിൽ സ്ഥാപിച്ച സ്​റ്റീൽ കാണിക്കവഞ്ചി തകർത്ത് മോഷണം. ചൊവ്വാഴ്ച പുലർച്ചെ 2 ഓടെയായിരുന്നു മോഷണം. കാണിക്കവഞ്ചിയുടെ പിന്നിലുള്ള താഴ് തകർത്താണ് പണം അപഹരിച്ചത്. ഹെൽമ​റ്റ് ധരിച്ച് ബൈക്കിൽ എത്തിയ രണ്ട് മോഷ്ടാക്കൾ റോഡ് മുറിച്ച് നടന്ന് വന്ന ശേഷം കാണിക്കവഞ്ചിയുടെ താഴ് തകർന്ന് പണം അപഹരിക്കുകയായിരുന്നു. നാണയത്തുട്ടുകൾ ഉൾപ്പടെ കൊണ്ടുപോയി. സി.സി.ടി.വി ദൃശ്യങ്ങൾ ഉൾപ്പടെ പൊലീസിന് ലഭിച്ചിട്ടുണ്ട്. സംഭവത്തിൽ തലയോലപ്പറമ്പ് പൊലീസ് അന്വേഷണം ശക്തമാക്കി.