വീടു കയറി​ ആക്രമണം, അഞ്ചുപേർ പി​ടി​യി​ൽ

കൊല്ലം: പോളയത്തോട്ടി​ൽ മൂന്നംഗ കുടുംബത്തെ വീട്ടിൽ കയറി ആക്രമിച്ച കേസിലെ പ്രതികളെ കൊല്ലം ഈസ്റ്റ് പൊലീസ് കസ്റ്റഡി​യി​ലെടുത്തു. ഇബ്നു (22), നൗഫൽ (23), പൊടിമോൻ (22), അമീർ (22), വിഘ്‌നേഷ് (23) എന്നിവരാണ് പി​ടി​യി​ലായത്.

19 ന് വൈകിട്ട് 7നാണ് സംഭവം. പോളയത്തോട് നാഷണൽ നഗർ 60 ൽ നിയാസിന്റെ വീടിന് മുന്നി​ലെത്തിയ പ്രതികൾ യാതൊരു പ്രകോപനവും കൂടാതെ അസഭ്യം പറയുകയും ഗേറ്റിൽ തട്ടി ബഹളം വയ്ക്കുകയും ചെയ്തത് ചോദ്യം ചെയ്ത നിയാസിനെ തള്ളി താഴെയിടുകയും അടിക്കുകയും ചെയ്തു. തടയാൻ ചെന്ന ഭാര്യാപിതാവ് അബ്ദുൾ ലത്തി​ഫിനെയും നിയാസിന്റെ ഭാര്യ ഷാമോളെയും ആക്രമിച്ചു. സമീപത്ത് കിടന്ന ഉണക്ക മടൽ ഉപയോഗിച്ച് തലയിൽ ഉൾപ്പെടെ അടിക്കുകയും നിലത്തു തള്ളിയിട്ടു ചവിട്ടുകയും ചെയ്തു. പ്രതികൾ സമീപത്തുള്ള വ്യാപാര സ്ഥാപനങ്ങൾക്ക് കെടുപാടുകൾ വരുത്തിയെങ്കിലും പരാതി ലഭിക്കാത്തതിനാൽ ഈ സംഭവത്തിൽ കേസെടുത്തിട്ടില്ല. ഷാമോളുടെ പരാതിയിൽ കസ്റ്റഡിയിൽ എടുത്ത നാല് പ്രതികളെ റിമാൻഡ് ചെയ്തു. കൈക്ക് പരിക്കേറ്റ പ്രതികളിലൊരാളായ അമീർ ജില്ല ആശുപത്രിയിൽ ചിക്കത്സയിലാണ്.