ട്രംപിന്റെ തീരുമാനം കേരളത്തിനും തിരിച്ചടിയാകും; ബാധിക്കുന്നത് ഇങ്ങനെ

ട്രംപിന്റെ 25 ശതമാനം തീരുവ തിരിച്ചടിയാകും

കൊച്ചി: ഇന്ത്യന്‍ ഉത്പന്നങ്ങളുടെ ഇറക്കുമതിക്ക് 25 ശതമാനം അധിക തീരുവയും പിഴയും ഈടാക്കുമെന്ന അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ പ്രഖ്യാപനം കേരളത്തിലെ കയറ്റുമതി മേഖലയിലും ആശങ്ക ശക്തമാക്കുന്നു. സംസ്ഥാനത്തെ ഉത്പന്നങ്ങളുടെ പ്രധാന കയറ്റുമതി വിപണികളിലൊന്നാണ് അമേരിക്ക. കശുവണ്ടി, കയര്‍, സമുദ്രോത്പന്നങ്ങള്‍, സുഗന്ധവ്യഞ്ജനങ്ങള്‍, അരി, തേയില തുടങ്ങിയവ വലിയ തോതില്‍ അമേരിക്കയിലേക്ക് കയറ്റി അയക്കുന്നുണ്ട്. സംസ്ഥാനത്തെ ഐ.ടി കയറ്റുമതിക്കും പുതിയ സാഹചര്യങ്ങള്‍ വെല്ലുവിളിയാകും.

അമേരിക്കയിലെ പ്രവാസി മലയാളികളെ ലക്ഷ്യമിട്ട് ചിപ്പ്‌സ്, റെഡി ടു ഈറ്റ്, പഴം, പച്ചക്കറികള്‍ തുടങ്ങി വിപുലമായ ഉത്പന്നങ്ങളാണ് കേരളത്തിലെ കമ്പനികള്‍ കയറ്റി അയക്കുന്നത്. ഇന്ന് മുതല്‍ ഇവയ്ക്ക് 25 ശതമാനം അധിക തീരുവ നല്‍കേണ്ടി വരുന്നതിനാല്‍ സംസ്ഥാനത്തെ ഉത്പന്നങ്ങളുടെ മത്സരക്ഷമത കുറയും. തുണി, റെഡിമെയ്ഡ് വസ്ത്രങ്ങള്‍ എന്നിവ കയറ്റുമതി നടത്തുന്ന കമ്പനികള്‍ക്കും പുതിയ സാഹചര്യം വെല്ലുവിളിയാകും. ഓണക്കാലത്തേക്ക് ആവശ്യമായ ഉത്പന്നങ്ങള്‍ അമേരിക്കയിലേക്ക് കയറ്റി അയക്കാന്‍ ഒരുങ്ങുന്ന കമ്പനികളും ആശങ്കയിലാണ്.

മത്സരക്ഷമത കുറയും

കേരളത്തിന്റെ ഉത്പന്നങ്ങള്‍ക്ക് അമേരിക്കന്‍ വിപണിയില്‍ മത്സരക്ഷമത കുറയാന്‍ അധിക തീരുവ ഇടയാക്കും. പ്രമുഖ വ്യാപാര എതിരാളികളായ സൗത്ത് ഏഷ്യന്‍ രാജ്യങ്ങള്‍ക്ക് കുറഞ്ഞ തീരുവയാണുള്ളത്. ഇന്തോനേഷ്യ, ഫിലിപ്പീന്‍സ് എന്നിവിടങ്ങളിലെ ഉത്പന്നങ്ങള്‍ക്ക് 19 ശതമാനവും വിയറ്റ്‌നാമിന് 20 ശതമാനവും തീരുവയാണ് ഈടാക്കുന്നത്. അതിനാല്‍ 25 ശതമാനം തീരുവ നല്‍കിയെത്തുന്ന കേരളത്തിലെ ഉത്പന്നങ്ങള്‍ക്ക് വിപണിയില്‍ മത്സരം കടുക്കും.

മത്സ്യകയറ്റുമതിക്ക് തിരിച്ചടി

ഇറക്കുമതിക്ക് 25 ശതമാനം തീരുവ ഈടാക്കാനുള്ള തീരുമാനം ചെമ്മീന്‍ ഉള്‍പ്പെടെയുള്ള സമുദ്രോത്പന്ന കയറ്റുമതിയെ പ്രതികൂലമായി ബാധിക്കും. സംസ്ഥാനത്ത് നിന്നുള്ള സമുദ്രോത്പന്ന കയറ്റുമതിയില്‍ 90 ശതമാനവും ചെമ്മീനാണ്. 2024 സാമ്പത്തിക വര്‍ഷത്തില്‍ ഇന്ത്യ 230 കോടി ഡോളറിന്റെ സമുദ്രോത്പന്നങ്ങളാണ് അമേരിക്കയിലേക്ക് കയറ്റി അയച്ചത്.

ആറ് ഇന്ത്യന്‍ കമ്പനികള്‍ക്ക് ഉപരോധം

ഇറാനുമായി വാണിജ്യ ഇടപാടുകള്‍ നടത്തുന്ന ആറ് ഇന്ത്യന്‍ കമ്പനികള്‍ക്ക് യു.എസ് ഉപരോധം ഏര്‍പ്പെടുത്തി. ഇറാനില്‍ നിന്ന് പെട്രോളിയം ഉത്പന്നങ്ങള്‍ വാങ്ങിയതിനാണ് അല്‍ക്കെമിക്കല്‍ സൊലൂഷന്‍സ് അടക്കമുള്ള കമ്പനികള്‍ക്കെതിരെ നടപടിയെടുത്തത്.