ചിറ്റൂർ പുഴയിൽ കുളിക്കാനിറങ്ങിയ യുവാവ് ചുഴിയിൽപ്പെട്ട് മരിച്ചു, രണ്ടാമനായി തെരച്ചിൽ

പാലക്കാട്: ചി​റ്റൂർ പുഴയിൽ കുളിക്കാനിറങ്ങിയ യുവാവ് മുങ്ങിമരിച്ചു. കോയമ്പത്തൂരിൽ നിന്നെത്തിയ വിദ്യാർത്ഥി സംഘത്തിലെ രാമേശ്വരം സ്വദേശി ശ്രീ ഗൗതമാണ് മരിച്ചത്. ഒഴുക്കിൽപ്പെട്ട രണ്ടാമനായി തെരച്ചിൽ നടക്കുകയാണ്. നെയ്‌വേലി സ്വദേശി അരുൺ കുമാറിനായാണ് തെരച്ചിൽ നടക്കുന്നത്. ഇന്ന് ഉച്ചയ്ക്ക് രണ്ട് മണിയോടെയായിരുന്നു അപകടം. സ്‌കൂബാ സംഘമാണ് തെരച്ചിൽ നടത്തുന്നത്.

യുവാക്കൾ ചുഴിയിൽപ്പെട്ട് ഓവുചാലിലേക്ക് വീഴുകയായിരുന്നു. ശ്രീഗൗതമിനെ രക്ഷപ്പെടുത്തി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഇവിടെ ഒഴുക്ക് ശക്തമാണെന്നാണ് നാട്ടുകാർ പറയുന്നത്. അന്യസംസ്ഥാനങ്ങളിൽ നിന്ന് നിരവധിയാളുകളാണ് അവധി ദിവസം ആഘോഷിക്കാനായി ഇവിടേക്ക് വരുന്നത്. ഇതിനുമുൻപും ഇവിടെ അപകടങ്ങൾ സംഭവിച്ചിട്ടുണ്ട്.