കണ്ണൂരിലെ സ്‌ഫോടനം; വീട് വാടകയ്ക്ക് എടുത്ത ആൾക്കെതിരെ കേസെടുത്തു, പ്രതിക്ക് കോൺഗ്രസുമായി അടുത്ത ബന്ധമെന്ന് സിപിഎം

കണ്ണൂർ: കീഴറയിലെ സ്‌ഫോടനവുമായി ബന്ധപ്പെട്ട് വീട് വാടകയ്‌ക്കെടുത്ത് അനൂപ് മാലിക്കിനെതിരെ പൊലീസ് കേസെടുത്തു. സ്‌ഫോടകവസ്തു നിയമപ്രകാരമാണ് കേസെടുത്തിരിക്കുന്നത്. ഉത്സവങ്ങൾക്ക് വൻ തോതിൽ പടക്കം എത്തിക്കുന്ന ആളാണ് അനൂപ്. മരിച്ചയാൾ ഇയാളുടെ തൊഴിലാളിയാണെന്നാണ് സൂചന. സ്‌ഫോടനം നടന്ന വീട്ടിൽ നിന്ന് മൃതദേഹം ആശുപത്രിയിലേക്ക് മാറ്റി. 2016ൽ കണ്ണൂർ പൊടികുണ്ടിലെ വീട്ടിൽ സ്‌ഫോടക വസ്തു പൊട്ടിത്തെറിച്ചുണ്ടായ കേസിലെ പ്രതിയാണ് അനൂപ് മാലിക്.

'സംഭവത്തിൽ കണ്ണൂർ ചാലാട് സ്വദേശി മുഹമ്മദ് ആഷാം ആണ് മരിച്ചത്. കണ്ണപ്പുരം പൊലീസ് കേസ് രജിസ്റ്റർ ചെയ്തിട്ടുണ്ട്. ഈ വാടകവീട്ടിൽ കഴിഞ്ഞ ഒരു വർഷമായി ഇവർ താമസിക്കുന്നുണ്ടെന്നാണ് വിവരം. ഉത്സവത്തിന് ആവശ്യമായ പടക്കങ്ങൾ നിർമ്മിക്കുന്നതിനുള്ള അസംസ്കൃതവസ്തുക്കൾ ഇവിടെ സൂക്ഷിച്ചിട്ടുണ്ടായിരുന്നു. സംഭവത്തിൽ കൂടുതൽ അന്വേഷണം നടത്തിവരികയാണ്'- സിറ്റി പൊലീസ് കമ്മീഷണർ നിതിൻ രാജ് പറഞ്ഞു.

കണ്ണപുരം കീഴറയിലെ ഗോവിന്ദന്‍ എന്ന വ്യക്തിയുടെ ഉടമസ്ഥതയിലുള്ള വീട്ടിൽ ഇന്ന് പുലർച്ചെ രണ്ടുമണിക്കാണ് സ്‌ഫോടനം നടന്നത്. സ്‌ഫോടനത്തില്‍ വീട് പൂര്‍ണമായും തകര്‍ന്നു. വീടിനുള്ളില്‍ ശരീരാവശിഷ്ടങ്ങള്‍ ചിന്നിച്ചിതറിയ നിലയിലായിരുന്നുവെന്നാണ് വിവരം. വീട്ടില്‍ നിന്നും പൊട്ടാത്ത നാടന്‍ ബോംബുകള്‍ കണ്ടെത്തി. അപകടം നടന്ന സ്ഥലത്ത് ബോംബ് സ്‌ക്വാഡും പരിശോധന നടത്തുന്നുണ്ട്. പയ്യന്നൂരിൽ സ്‌പെയർ പാർട്‌സ് കട നടത്തുന്നവരാണ് വീട്ടിൽ താമസിച്ചിരുന്നതെന്നാണ് വിവരം. ഇവരെക്കുറിച്ച് പ്രദേശവാസികൾക്ക് കൂടുതൽ അറിവില്ല. വീടിനുള്ളിൽ രണ്ടുപേരാണ് താമസിച്ചിരുന്നത്. രാത്രി എത്തുന്ന ഇവർ പുലർച്ചെ മടങ്ങാറാണ് പതിവ്. സ്‌ഫോടനത്തിന്റെ ആഘാതത്തിൽ സമീപത്തെ വീടുകളിലും നാശനഷ്‌ടങ്ങളുണ്ടായി. നിരവധി വീടുകളുടെ വാതിലുകൾ തകരുകയും ചുവരുകളിൽ വിള്ളൽ വീഴുകയും ചെയ്‌തിട്ടുണ്ട്.

അതേസമയം, കണ്ണപുരം സ്‌ഫോടനത്തിൽ രാഷ്ട്രീയ ആരോപണവുമായി സിപിഎം രംഗത്തെത്തിയിട്ടുണ്ട്. പ്രതി അനൂപ് മാലികിന് കോൺഗ്രസുമായി അടുത്ത ബന്ധമുണ്ടെന്നാണ് കണ്ണൂർ ജില്ലാ സെക്രട്ടറി കെ കെ രാഗേഷ് ആരോപിക്കുന്നത്. ഇയാൾക്കെതിരെ കേസെടുത്ത് രാഷ്ട്രീയം പരിശോധിക്കണം. ഉത്സവങ്ങളും ആഘോഷങ്ങും അടുത്തൊന്നും ഇല്ല. ഇത്രയും മാരകമായ സ്‌ഫോടക വസ്തു എന്തിനാണ് നിർമിക്കുന്നതെന്ന് ബന്ധപ്പെട്ടവർ പരിശോധിക്കണമെന്നും രാഗേഷ് ആവശ്യപ്പെട്ടു.