ശമ്പളത്തില്‍ നിന്ന് മിച്ചംപിടിക്കുമ്പോള്‍ സംഭവിക്കുന്നത്, ആസ്തി വര്‍ദ്ധിപ്പിക്കാന്‍ സ്വീകരിക്കാം ഈ മാര്‍ഗങ്ങള്‍

കാശ് സമ്പാദിച്ച് സമ്പാദിച്ച് പണക്കാരനാകാമെന്ന് കരുതിയാല്‍ മൂത്തു നരച്ച് കുഴിയില്‍ പോകത്തേയുള്ളൂ,. അതുകൊണ്ടാണ് കിട്ടുന്ന കാശ് കൂട്ടിവെച്ച് പലരും കുതിര കളിക്കുന്നത്. കിട്ടിയാല്‍ ഊട്ടി, ഇല്ലെങ്കില്‍ ചട്ടി. അത്രേയുള്ളൂ. കിലുക്കത്തിലെ ജഗതിയുടെ ഫിലാസഫിയാണിത്. ഓരോ ഇടത്തരക്കാരന്റെയും മനോഗതിയും ഇതാണ്. ചെറിയ ചെറിയ സമ്പാദ്യം കൊണ്ട് എന്താകാനെന്നാണ് പലരുടെയും ചിന്താഗതി.

ചെലവ് നിയന്ത്രിക്കണം

ചെലവ് നിയന്ത്രിക്കാന്‍ ആദ്യം മനസിനെ വരുതിയിലാക്കണം. സ്വന്തം മനസും കുടംബാംഗങ്ങളുടെ മനസും ഇതിനായി പാകപ്പെടുത്തണം. പിശുക്കല്ല വേണ്ടത്. ചെലവ് നിയന്ത്രിക്കാന്‍ പിശുക്ക് കാട്ടിയാല്‍ ആരും കൂടെയുണ്ടാകില്ല. ഭാവനാപൂര്‍ണമായ തീരുമാനങ്ങളും ചിട്ടയായ ജീവിത ശൈലിയുമാണ് ഇതിനാവശ്യം. എല്ലാ സുഖങ്ങളും ആനന്ദവും അനുഭവിച്ചും ആസ്വദിച്ചും തന്നെ ജീവിതം ചിട്ടയാക്കാം. സാമ്പത്തിക അച്ചടക്കമാണ് സമ്പത്തിലേക്കുള്ള പാത സുഗമമാക്കുന്നത്. സമ്പത്തുണ്ടാക്കാന്‍ ആഗ്രഹമില്ലാത്തവര്‍ ചുരുക്കമാണ്. ബഹുഭൂരിപക്ഷത്തിനും ജീവിച്ചുപോകാനുള്ളതു കാശ് മതിയെന്നാണ് ആഗ്രഹം. നന്നായി ജീവിക്കാനും കുടുംബത്തിന് സന്തോഷം പകരാനുമാണ് ഇക്കൂട്ടര്‍ സമ്പത്ത് ആഗ്രഹിക്കുന്നത്. ചിലര്‍ക്ക് സമ്പത്ത് പാരമ്പര്യമായികിട്ടുന്നു. ബഹുഭൂരിപക്ഷത്തിനുമത് അദ്ധ്വാനിച്ചുണ്ടാക്കണം.

എങ്ങനെ പണമുണ്ടാക്കാം

അദ്ധ്വാനത്തിലൂടെ സമ്പത്തുണ്ടാക്കാന്‍ ബിസിനസോ വ്യവസായമോ ആരംഭിക്കാം. എന്നാലത് ലോകത്തെ ഏറ്റവും നഷ്ടസാദ്ധ്യതയുള്ള ഏര്‍പ്പാടാണ്. തുടങ്ങുന്നതില്‍ 99 ശതമാനവും പരാജയപ്പെട്ടേക്കും. പ്രൊഫഷണലുകള്‍, സ്പോര്‍ട്ട്സ് താരങ്ങള്‍, കലാകാരന്മാര്‍ എന്നിവര്‍ക്കും പണമുണ്ടാക്കാന്‍ സാധിക്കും. പക്ഷേ അതിന് നൈസര്‍ഗികമായ കഴിവ് വേണം. പഠിച്ച് ഡോക്ടര്‍മാരും എന്‍ജിനീയര്‍മാരും വക്കീലന്മാരും ചാര്‍ട്ടേര്‍ഡ് അക്കൗണ്ടന്റുമാരുമാകാം. ഇതിനൊന്നും കഴിയാത്തവര്‍ എന്തുചെയ്യും. ബിസിനസിന് വലിയ വിറ്റുവരവുണ്ടെങ്കിലും ലാഭം ഇല്ലെങ്കില്‍ പാളും. ജോലിക്കാര്‍ക്ക് എത്ര വലിയ വരുമാനമോ ശമ്പളമോ കിട്ടിയാലും മിച്ചം പിടിച്ചാലേ കാര്യമുള്ളൂ. കിട്ടുന്ന വരുമാനമല്ല, ചിലവുകളെല്ലാം കഴിഞ്ഞുള്ള ലാഭം അല്ലെങ്കില്‍ സമ്പാദ്യമാണ് സമ്പത്തിലേക്കുള്ള വഴി തുറക്കുന്നത്. ലാഭമുണ്ടാക്കാന്‍ ബിസിനസുകാരും പ്രൊഫഷണലുകളും വിദഗ്ധരുടെ സേവനം തേടും. ശമ്പളക്കാര്‍ സ്വയം ചെയ്യണം.

സമ്പത്തിലേക്കുള്ള വഴി

ശമ്പളം അഥവാ വരുമാനത്തില്‍ നിന്ന് ബുദ്ധിപൂര്‍വ്വം മിച്ചം പിടിക്കുമ്പോഴാണ് സമ്പത്തിലേക്ക് വഴി തുറക്കുന്നത്. പ്രതിമാസം മിച്ചം പിടിക്കുന്ന ഈ തുകയാണ് ഭാവി ജീവിതത്തിനുള്ള ആസ്തി. അല്ലെങ്കില്‍ കുടുംബത്തിന് സന്തോഷം നല്‍കാനുള്ള ഉപാധി. ലഭിക്കുന്ന വരുമാനമല്ല കുടുംബത്തിന് സന്തോഷം നല്‍കുക. വരുമാനത്തില്‍ നിന്ന് ഉണ്ടാക്കുന്ന സമ്പാദ്യമാണ് സമ്പത്തുണ്ടാക്കാനുള്ള ഏക ഉപാധി. വരവ് കൂടുംതോറും കൂടുന്ന പ്രതിഭാസമാണ് ചിലവ്. വരവ് കൂടുകയും ചിലവ് കുറയുകയും ചെയ്യുമ്പോള്‍ സമ്പാദ്യം ഉയരും. വരവും ചിലവും തുലനം ചെയ്ത് മാസാമാസം ഒരു നിശ്ചിത തുക മിച്ചം പിടിച്ച് വിവിധ പദ്ധതികളില്‍ നിക്ഷേപിക്കുകയെന്നതാണ് ശമ്പള വരുമാനക്കാര്‍ക്ക് സമ്പത്തുണ്ടാക്കാനുള്ള മാര്‍ഗം.