ഭൂമി വാങ്ങാതെയും നേട്ടമുണ്ടാക്കാം; റിയല്‍ എസ്റ്റേറ്റ് മേഖലയിലെ പുതിയ ട്രെന്‍ഡ് ഇങ്ങനെ

റിയല്‍ എസ്റ്റേറ്റ് ഇന്‍വെസ്റ്റ്മെന്റ് ട്രസ്റ്റുകള്‍ക്ക് പ്രിയമേറുന്നു

കൊച്ചി: നേരിട്ട് ഭൂമി വാങ്ങാതെ റിയല്‍ എസ്റ്റേറ്റ് രംഗത്തെ ഉണര്‍വില്‍ നിന്ന് നേട്ടമുണ്ടാക്കാന്‍ നിക്ഷേപകരെ സഹായിക്കുന്ന സംവിധാനമായ റിയല്‍ എസ്റ്റേറ്റ് ഇന്‍വെസ്റ്റ്മെന്റ് ട്രസ്റ്റുകള്‍ക്ക്(റൈറ്റ്‌സ്) ഇന്ത്യന്‍ വിപണിയില്‍ താത്പര്യമേറുന്നു. വരുമാനം ലഭിക്കുന്ന വാണിജ്യ ആസ്തികളായ ഓഫീസുകള്‍, ഷോപ്പിംഗ് മാളുകള്‍, വെയര്‍ ഹൗസുകള്‍ തുടങ്ങിയവയില്‍ നിക്ഷേപ പങ്കാളിയായി വരുമാനം നേടാനാണ് ഇതിലൂടെ അവസരമൊരുങ്ങുന്നത്. റൈറ്റ്‌സിന്റെ യൂണിറ്റുകള്‍ സ്റ്റോക്ക് എക്‌സ്‌ചേഞ്ചുകളില്‍ ലിസ്റ്റ് ചെയ്തിട്ടുള്ളതിനാല്‍ എപ്പോള്‍ വേണമെങ്കിലും വിറ്റ് പണമാക്കാനും കഴിയും. അതിവേഗം വളരുന്ന രാജ്യത്തെ വാണിജ്യ റിയല്‍ എസ്റ്റേറ്റ് മേഖലയില്‍ നിന്ന് സാധാരണ നിക്ഷേപകര്‍ക്കും നേട്ടമുണ്ടാക്കാന്‍ റൈറ്റ്സ് സഹായിക്കുന്നു.

ഓഹരികളിലെന്ന പോലെ റൈറ്റ്സിലും നിക്ഷേപിക്കാന്‍ മ്യൂച്വല്‍ ഫണ്ടുകള്‍ക്ക് കഴിഞ്ഞ ദിവസം സെക്യൂരിറ്റീസ് ആന്‍ഡ് എക്സ്ചേഞ്ച് ബോര്‍ഡ് ഒഫ് ഇന്ത്യ(സെബി) അനുമതി നല്‍കിയതോടെ ഈ മേഖലയില്‍ മികച്ച വരുമാനത്തിന് സാദ്ധ്യതയുണ്ടെന്ന് വിദഗ്ദ്ധര്‍ പറയുന്നു. നിക്ഷേപ പങ്കാളിത്തം കൂടാനും നിക്ഷേപകര്‍ക്ക് മികച്ച നേട്ടം ലഭിക്കാനും ഇതോടെ സാഹചര്യമൊരുങ്ങി.

ഓഹരി, സ്വര്‍ണം, മ്യൂച്വല്‍ ഫണ്ടുകള്‍ തുടങ്ങിയ മേഖലകളെല്ലാം കഴിഞ്ഞ വര്‍ഷങ്ങളില്‍ മികച്ച വളര്‍ച്ച നേടിയതിനാല്‍ അടുത്ത മുന്നേറ്റം റിയല്‍ എസ്റ്റേറ്റ് രംഗത്താകുമെന്നും ധനകാര്യ വിദഗ്ദ്ധര്‍ പറയുന്നു.

ഇന്ത്യയിലെ ലിസ്റ്റഡ് റൈറ്റ്സ്

1.ബ്രൂക്ക്ഫീല്‍ഡ് ഇന്ത്യ റിയല്‍ എസ്റ്റേറ്റ് ട്രസ്റ്റ്

2.എംബസി ഓഫീസ് പാര്‍ക്ക് റൈറ്റ്സ്

3. മൈന്‍ഡ്സ് സ്‌പേസ് പാര്‍ക്ക്സ് റൈറ്റ്

4. നെക്സസ് സെലക്ട് ട്രസ്റ്റ്

5. നോളഡ്ജ് റിയല്‍റ്റി ട്രസ്റ്റ്

നിലവില്‍ റൈറ്റ്സിന്റെ ഇന്ത്യയിലെ ആസ്തി 18,000 കോടി രൂപ

റിയല്‍ എസ്റ്റേറ്റ് ഇന്‍വെസ്റ്റ്മെന്റ് ട്രസ്റ്റ്

വരുമാനം ലഭിക്കുന്ന വാണിജ്യ പ്രോപ്പര്‍ട്ടികള്‍ വാങ്ങാനും മാനേജ് ചെയ്യാനും ഉപഭോക്താക്കളില്‍ നിന്ന് പണം സമാഹരിക്കുന്ന സ്ഥാപനങ്ങളാണ് റിയല്‍ എസ്റ്റേറ്റ് ഇന്‍വെസ്റ്റ്മെന്റ് ട്രസ്റ്റുകള്‍. ഈ ആസ്തികളില്‍ നിന്ന് ലഭിക്കുന്ന വരുമാനത്തില്‍ 90 ശതമാനവും ട്രസ്റ്റുകള്‍ ലാഭവിഹിതമായി നിക്ഷേപകര്‍ക്ക് കൈമാറും. നേരിട്ട് ഭൂമി വാങ്ങാതെ റിയല്‍ എസ്റ്റേറ്റ് നിക്ഷേപം നടത്താമെന്നതാണ് പ്രത്യേകത. നൂറ് രൂപ മുതല്‍ എത്ര ചെറിയ തുകയും ഇവയില്‍ നിക്ഷേപിക്കാം. സെബിയാണ് നിയന്ത്രണ ഏജന്‍സി. സ്റ്റോക്ക് എക്സ്‌ചേഞ്ചില്‍ യൂണിറ്റുകള്‍ ലിസ്റ്റ് ചെയ്തിട്ടുള്ളതില്‍ നിക്ഷേപകര്‍ക്ക് വിശ്വാസ്യതയും സുതാര്യതയും ഉറപ്പാക്കുന്നു.