മഞ്ചേശ്വരം തിര. കോഴക്കേസ്: സർക്കാരിന്റെ അപ്പീലിൽ കെ. സുരേന്ദ്രന് നോട്ടീസ്

കൊച്ചി: മഞ്ചേശ്വരം തിരഞ്ഞെടുപ്പ് കോഴക്കേസിൽ ബി.ജെ.പി മുൻ സംസ്ഥാന അദ്ധ്യക്ഷൻ കെ. സുരേന്ദ്രൻ ഉൾപ്പെടെ എതിർകക്ഷികൾക്ക് ഹൈക്കോടതി നോട്ടിസയച്ചു. പ്രതികളെ വെറുതേവിട്ട കാസർകോട് സെഷൻസ് കോടതി ഉത്തരവിനെതിരെ സർക്കാർ നൽകിയ അപ്പീലിലാണ് ജസ്റ്റിസ് വി.ജി. അരുണിന്റെ നടപടി. 2021ലെ നിയമസഭാ തിരഞ്ഞെടുപ്പിൽ പത്രിക പിൻവലിക്കാനായി എതിർ സ്ഥാനാർത്ഥി കെ.സുന്ദരയെ ഭീഷണിപ്പെടുത്തിയെന്നും പിന്നീട് രണ്ടര ലക്ഷം രൂപയും 8,300 രൂപയുടെ മൊബൈൽ ഫോണും നൽകി അനുനയിപ്പിച്ച് പിൻവലിപ്പിച്ചെന്നുമാണ് കേസ്. സുരേന്ദ്രനെയടക്കം വെറുതേവിട്ട് 2024 ഒക്ടോബർ അഞ്ചിനാണ് സെഷൻസ് കോടതി ഉത്തരവിട്ടത്. ഇതിനെതിരെ സമർപ്പിച്ച പുനപ്പരിശോധന ഹർജി പിൻവലിച്ചാണ് സർക്കാർ അപ്പീൽ നൽകിയത്. 30ന് വീണ്ടും പരിഗണിക്കും.